افغان فوټبال لیګ کې سرسبزیاشلر لوبډلې صرافانو او ابومسلم موج ساحل لوبډلې ته ماته ورکړه
د افغانستان فوټبال فدراسيون د اتلانو لیګ د څلورم پړاو سيالیو کې د پنجشنبې په ورځ لومړۍ لوبه کې د فراه ابومسلم لوبډلې د بلخ موج ساحل اف سي ته ۳ پر صفر او د فاریاب سرسبزیاشلر لوبډلې د هرات صرافانو لوبډلې ته ۲ پر ۱ ماته ورکړه.
د همدې سياليو په جدول کې د فراه ابوملسم لومړۍ او د هرات اټک انرژۍ دویم ځای لري.
د افغانستان د فوټبال اتلانو لیګ د لسمې اونۍ د پنجشنبې ورځې په لومړۍ سيالۍ کې د فراه ابومسلم لوبډلې ۳ پر صفر د بلخ موج ساحل اف سي ته په ماتې ورکولو سره د ۲۸ نمرو په لرلو سره د لوبو د جدل په سر کې ځای لري.
په همدې سيالۍ کې د فراه ابوملسم لوبډلې لپاره ایمانويل یاغر، سهراب افغان او حبیب الله هوتک ګولونه تر سره کړه.
د همدې ورځي په دويمه سيالۍ کې د فاریاب سرسبز یاشلر لوبډلې د هرات صرافانو لوبډلې ته ۲ پر يو په ماتې ورکولو سره ۹ نمرې ترلاسه کړې.
د سرسبز یاشلر لوبډلې لپاره میرویس غفوري او حفیظ الله عبدالهي او د صرافانو لوبډلې لپاره بیا زبیر نیکزاد ګولونه تر سره کړل.
سرسبز یاشلر لوبډلې په دې بریا سره د لوبو په جدول کې نهم او د هرات صرافانو لوبډلې د لسو نمرو په لرو اتم ځای خپل کړ.
د افغانستان د فوټبال د اتلانو لیګ په څلورم پړاو کې ۱۲ لوبډلې د اتلولۍ ګټلو لپاره یو د بل سره لوبیږي.
د افغانستان فوټبال اتلانو لیګ دغه سيالۍ د هرات په کوربتوب شروع دي.
