د فرانسې پارلمان مرستیاله:۲۱مه پېړۍ کې پر ښځو د طالبانو بندیزونه د ښځو د ورکېدو په معنا دي
د فرانسې پارلمان مرستیالې ماود پتیت په افغانستان کې د طالبانو له لوري پر ښځو د تازه لګول شویو بندیزونو پر ضد نیوکې کړې او په ۲۱مه پېړۍ کې یې پر ښځو د طالبانو بندیزونه له ټولنې د ښځو د ورکېدو په معنا بللي.
هغې دا څرګندونې د ملا هبتالله د هغه تازه فرمان په غبرګون کې کړې چې له مخې په ودانیو او کورونو کې د کړکیو بندیدو امر شوی څو د ګاونډ ښځینه ترې ښکاره نه شي.
د فرانسې د پارلمان مرستیالې وویل، چې طالبان تر هغې پورې خپلو افراطي بندیزونو ته دوم ورکوي، چې ښځې په بشپړه توګه له ټولنې ورکې کړي.
ماود پتیت د پوښتنې په ډول ویلي چې په ۲۱مه پېړۍ کې پر ښځو دا ډول بندیزونه څنګه امکان لري؟
تیره اوونۍ د طالبانو مشر ملا هبتالله په خپل یوه تازه فرمان کې امر کړی چې په افغانستان کې دې خلک د یو او بل د کورونو طرف ته کړکۍ نه پریږدې چې د بل ګاونډي د کور ښځې یا نجلۍ ترې ونه لیدل شي.
همدا راز د طالبانو تر واک لاندې د اقتصاد وزارت د ملا هبتالله د فرمان پر بنسټ په یوه تازه مکتوب کې ټولو بهرنیو او کورنیو اینجوګانو ته ګواښ کړی، که یې ښځینه کارکوونکې له دندو لرې نه کړې؛ نو جوازونه به یې لغوه کړي او دفترونه به یې هم ور وتړي.
