ژوند او روغتیا؛ له هر قدم اخیستلو سره له خپګان یا ډېپرېشن سره خدای پاماني وکړئ
خپګان یوه پېچلې رواني ناروغي ده، چې په دې ناروغۍ اخته کسان ډېری وختونه خپه وي او هر وخت د بې وسۍ احساس کوي. مګر خپګان یوازې یوه ذهني ناروغي نه ده چې په "ذهن" پورې محدوده وي، بلکې خپګان بدن هم اغېزمن کوي.
خپګان په عمر پورې محدوده نه ده، د هر عمر لرونکي خلک اغېزمنوي.
اوس پوښتنه دا ده، چې څنګه له خپګان څخه ځان وژغورو یا مو خپګان کم کړو؟
په هسپانیا کې یوې طبي څېړنې ډېره اسانه طریقه ښودلې، چې د خپګان اغېزه کمه یا یې هم له منځه وړلی شي.
په دغې څېړنه کې موندل شوي، چې که هره ورځ پیاده وګرځئ نو خپګان له منځه او یا یې هم کمولی شي.
د کاستیل لا مانچا (Castile-La Mancha) پوهنتون څېړنې موندلې، چې پیاده تګ نه یوازې ستاسو فزیکي بڼه ښه کوي، بلکې ذهن ته هم ګټه رسولی شي.
تاسو که د ورځې هر څومره ډېر قدم ووهی، هومره به مو خپګان کم شي.
دغه څېړنه د نړۍ پر ۹۶ زرو زیاتو کسانو ترسره شوې، چې په ترڅ کې یې د ۳۳ څېړنیزو راپورونو کې د دوی قدم وهلو اغېزه پر بدن او ذهن څېړل شوي دي.
د دې اشخاصو د قدم وهلو عادتونو او په رواني روغتیا باندې د تاثیراتو ترمنځ اړیکه څېړل شوې ده.
پایلو ښودلې، چې حتی په ورځ کې څو قدمه قدم وهل ستاسو د خپګان خطر کموي.
پایله دا شوه، چې ډېر قدم وهل کولی شي ستاسو روح ښه کړي او خپګان درڅخه واخلي.
په دې څېړنه کې وښودل شوه، هغه کسان چې د ورځې ۵ زره قدمه وهي د خپګان نښې په کې کمې شوې وې.
د دغې څېړنې له مخې، له هرو زر اضافي قدم وهلو سره ۹ سلنه د خپګان خطر کمېږي.
که تاسو هره ورځ ۷ زره قدم ووهئ په خپګان د اخته کېدو خطر ۳۱ سلنه او له ۷ نیم زره قدم وهلو سره ۴۳ سلنه کمولی شئ او دا په عمر پورې تړلې نه ده، ځکه په هر عمر لرونکي کس یو شان اغېز کوي.
د څېړونکو په وینا، له قدم وهلو سربیره، نور فزیکي فعالیتونه لکه ایروبیک تمرینونه، د درنو وزنونو پورته کول او یوګا هم کولی شي د خپګان خطر کم یا هم مخنیوي کې یې مرسته وکړي. دوی وایي چې اړتیا نه شته، چې تاسو ځغاسته وکړی، ساده تګ هم د رواني روغتیا لپاره د پام وړ ګټې لري.
