هند راتلونکی کال د اتلولۍ جام لوبې د پاکستان پرځای په بل هېواد کې کوي
د کرکټ نړیوالې شورا (ICC) د پنجشنبې په ورځ اعلان وکړ چې هند به د راتلونکي کال اتلولۍ جام لوبې په بې طرفه ځای کې کوي.
هندیوه نیمه میاشت وړاندې د کرکټ نړیوالې شورا ته ویلي و چې دوی د امنیتي اندیښنو او سیاسي کړکېچونو له امله پاکستان ته خپله لوبډله نه لېږي.
د هوکړې له مخې، پاکستان به هم د ای سي سي په هغو لوبو کې ګډون وکړي چې هند به یې کوربه وي، خو لوبې به په نورو هېوادونو کې ترسره کیږي چې لا یې پرېکړه نه ده شوې.
د ای سي سي په اعلامیه کې راغلی، چې د ۲۰۲۴-۲۰۲۷ دورې په جریان کې به د هند او پاکستان لوبې په بې طرفه لوبغالي کې ترسره شي.
دا پرېکړه به د ۲۰۲۵ کال ای سي سي نارینه وو اتلولۍ جام (چې کوربه یې پاکستان دی) باندې هم پلې شي.
پاکستان کرکټ بورډ په پیل کې ددې مخالفت کړی و، خو وروسته یې د دواړو لوبډلو لپاره د بې طرفه لوبغالو پر هوکړې رضایت وښود.
د اتلولۍ جام په دې سیالیو کې به د هند او پاکستان ترڅنګ، افغانستان، اسټرالیا، بریټانیا، نیوزیلینډ، سویلي افریقا او بنګله دېش هم ګډون وکړي.
د هند تازه پرېکړه د ۲۰۰۸ کال له ممبې بریدونو وروسته، چې پاکستاني وسله وال پکې ښکیل وو، له پاکستان سره د دوه اړخیزه سیالیو د نه کولو پالیسۍ یوه برخه ده.
