د افغانستان او زمبابوې لوبډلو ترمنځ لوبه د باران له کبله وځنډېده
د افغانستان او زمبابوې کرېکټ ملي لوبډلو ترمنځ یو ورځنۍ لوبه د باران د ورېدو له امله وځنډېده. د دغې لوبلړۍ لومړۍ لوبه چې نن د کابل په وخت د غرمې په ۱۲بجو د زمبابوې په کوربهتوب هرارې لوبغالي کې پیلېده، وځنډېده.
تر دې لږ وړاندې د افغانستان کرېکټ بورډ خبر ورکړ، چې رحمان الله ګربز د ټپي کېدو له امله له لوبو بهر شو او د هغه ترڅنګ مجیب الرحمن ځدراڼ ته هم په دغو لوبو کې د نه لوبېدو او استراحت سپارښتنه شوې ده.
کرېکټ بورډ پر اېکس پاڼه لیکلي، چې د رحمان الله ګربز پر ځای به په دغو لوبو کې محمد اسحاق ولوبېږي.
تر دې وړاندې د دغې لوبلړۍ لپاره د افغانستان د کرېکټ بورډ لهخوا په خپور شوي نوملړ کې د عبدالمالک، دروېش رسولي، حشمت الله شاهدي، صدیق اتل، عظمت الله عمرزي، کلبدین نایب، محمدنبي، رحمت شاه، اکرام عليخېل، رحمان الله ګربز، الله محمد غضنفر، بلال سمیع، فرید احمد، فضل الحق فاروقي، مجیب الرحمن ځدراڼ، ننګیالي خروټي، نویډ ځدراڼ او راشدخان نومونه راغلي وو.
افغانستان د زمبابوې لوبډلې پر وړاندې ټولې ۲۸ یو ورځنۍ لوبې ترسره کړي، چې په کې ۱۸ لوبې یې ګټلې او ۱۰ نورې لوبې بیا زمبابوې لوبډلې ګټلې دي.
په دغو لوبو کې به د افغان کرېکټ ملي لوبډلې لوبډلمشري د حشمت الله شاهدي پر غاړه وي.
تر دې وړاندې افغان لوبډلې د زمبابوې په کوربهتوب د درېیو شل اوریزو لوبو لوبلړۍ ګټلې وه.
