د ازادۍ ملي ګوند د افغانستان د ژغورنې ملي مجمع اېتلاف سره پرېکون اعلان کړو
د تېر جمهوري نظام د ملي امنیت پخواني مشر رحمت الله نبیل په مشرۍ د ازادۍ ملي ګوند د افغانستان د ژغورنې ملي مجمع اېتلاف سره پرېکون اعلان کړ. یاد ګوند د یوې اعلامیې په خپرولو سره ویلي: «د دغه اېتلاف تګلارې زموږ له لید لوري سره ټکر کې دي.»
د روانې میاشتې د ډسمبر په شپږمه نېټه د طالبانو د حکومت ځینو مخالفو شخصیتونو او د پخواني رژیم د ځینو چارواکو په ګډون د "افغانستان د ژغورنې لپاره ملي مجمع" په نوم یوه نوي سیاسي خوځښت پیل اعلان کړ او د طالبانو حاکمیت چې دوی یې نامشروع او استبدادي بولي، په مبارزې ټینګار کړی دی.
د ازادۍ ملي ګوند په اعلامیه کې راغلي: «دغه پرېکړه یې د دې لپاره کړې چې د افغانستان د ازادۍ ملي ګوند سیاسي خپلواکي وساتل شي او د هغو تګلارو د پیاوړتیا لپاره کار وشي، چې د ټولو وګړو په ځانګړې توګه د ښځو، ځوانانو او روڼاندو او نورو موثر او ژمنو اقشارو په اغېزمن ګډون ټینګار کوي».
په اعلامیه کې بیا دا نه دي په ډاګه شوي، چې کومې تګلارې د دوی له لید لوري سره په ټکر کې دي.
خو د اعلامیې له مخې، دغه ګوند باور لري چې د افغانستان د اوسني تاریخي وضعیت اړتیا د داسې نويو اېتلافونو جوړېدل دي، چې په ولسواکۍ، عدالت او د وګړو پر مساوي حقونو ولاړ وي.
یاده دې وي، چې د دغه خوځښت ښکاره غړي عبدالرب الرسول سیاف، احمد مسعود، سرور دانش، محمد محقق، محمد یونس قانوني، عطا محمد نور، عبدالرشید دوستم، محمد عمر داودزی، تادین خان اڅکزی، رحمت الله نبیل او د پخواني حکومت ځینو نور پخواني چارواکي دي.
دوی په خپله اعلامیه کې ویلي وو، چې د "افغانستان د ژغورنې لپاره ملي مجمع" کې له ۳۰ څخه زیات سیاسي ګوندونه او جریانونه غړیتوب لري او ترڅنګ یې محمد کریم خلیلي، صلاح الدین رباني او اسماعیل خان هم د دغه نوي اېتلاف څخه خپل ملاتړ اعلان کړی دی.
