ایراني رسنۍ: له کرمان څخه نږدې دوه زره افغان کډوال بېرته افغانستان ته ستانه کړل شوي دي

ایراني رسنۍ اېرنا راپور ورکړی، چې له تېرو درېیو ورځو راهیسې له کرمان څخه شاوخوا یو زر او ۷۸۸ تنه بې اسنادو افغان کډوال بېرته افغانستان ته ستانه کړل شوي دي.

په دغه راپور کې راغلي، چې د کرمان لویې ځارنوالۍ په تېرو ۷۲ ساعتونو کې دغه یو زر او ۷۸۸ تنه بې اسنادو کډوال تر پېژندلو وروسته خپل هېواد ته ستانه کړي دي.
په دغه راپور کې د کرمان د لوی څارنوال مهدي بخشي له حوالې راغلي، چې دغه کسان د «ټولنیز امنیت د ښه والي» طرحې په چوکاټ کې د امنیتي موخو له امله خپل هېواد ته ستانه شوي دي.
هغه زیاته کړې، چې بهرني وګړي باید دغه هېواد ته د تګ راتګ او اوسېدو لپاره قانوني اسناد ولري او له اسنادو پرته به ورسره قانوني چلند وشي او له دغه هېواده به په زور و اېستل شي.
تر دې وړاندې په مشهد کې د ایران د بهرنیو چارو د وزارت د استازي دفتر مشر ویلي و، چې په ایران کې له دوو څخه تر دوه نیم مېلیونو پورې افغان کډوال د اوسېدو له اسنادو پرته ژوند کوي.
احمد معصومیفر ویلي و، چې دغه کډوال به د روان کال تر پایه له ایرانه واېستل شي.