کرکټ بورډ د اماراتو له ورزشي شورا په لوبغالو او ویزو کې د همکارۍ او اسانتیاوو غوښتنه کړې

افغان کرکټ بورډ وايي، چې نصیب خان ځدراڼ د متحده عربي امارات د ابوظبۍ ورزشونو شورا له سرمنشي سره په لیدنه کې په افغانستان کې د کرکټ لوبغالو په رغنیزو چارو او افغان لوبغاړو او د کرکټ بورډ کارکوونکو لپاره د ویزو د اسانتیاوو په برخه کې د همکارۍ غوښتنه کړې.

افغان کرکټ بورډ د یک شنبې په ورځ د (لیندۍ۲۵مه) د یوې خبرپاڼې په خپرولو سره ویلي، چې دغه لیدنه د ډسمبر پر ۱۲ مه شوې ده.

خبرپاڼه زیاتوي، چې په دې لیدنه کې د افغانستان د کرکټ بورډ اجرایوي رییس نصیب خان ځدراڼ د متحده عربي اماراتو د ابوظبۍ ورزشونو شورا له سرمنشي عارف حمد العواني سره د دواړو هېوادونو ترمنځ د کرکټ په ډګر کې د دوه اړخیزو همکاریو، په سیمه کې د کرکټ د ودې او په افغانستان کې د کرکټ په ډګر کې د رغنیزو چارو په برخه کې د همکاریو په اړه خبرې کړې دي.

په خبرپاڼه کې راغلي، چې نصیب خان ځدراڼ له عارف حمد العواني څخه په افغانستان کې د نجیب تره کي، خوست، کندوز او کابل کرکټ لوبغالو په رغنیزو چارو او افغان کرکټ په پراختیا کې د یاد هېواد د همکارۍ غوښتنه کړې ده.

نصیب خان د متحده عربي اماراتو له دغه چارواکي څخه په یاد هېواد کې د افغانستان په کوربه توب د لوبلړیو د ترسراوي پر مهال په عملیاتي چارو کې د همکارۍ، په متحده عربي اماراتو کې افغان کرکټ بورډ ته د یوه دفتر د ورکولو او لوبغاړو او د کرکټ بورډ کارکوونکو ته د ویزو په برخه کې د اسانتیاوو غوښتنې هم کړې دي.

افغان کرکټ بورډ ویلي، چې د متحده عربي اماراتو د ابو ظبۍ د ورزشونو شورا سرمنشي د غوښتنو د منلو ژمنه کړې او ډير ژر به دواړه لوري په دې تړاو د همکارۍ تړونونه هم لاسلیک کړي.