افغانستان د دریو شل اوره لوبو په لومړۍ سيالۍ کې له زمبابوې ماته وخوړه

زمبابوې کرېکټ لوبډلې د دريو شل اوره لوبو په لومړۍ سیالي کې افغانستان ته د څلور ويکټو په توپير ماته ورکړه. دغه لوبلړۍ نن چار شنبه د زمبابوې په کوربه توب پيل شوه.

د افغانستان او زمبابوې کرکټ لوبډلو ترمنځ د دریو شل اوره لوبو د لومړۍ سيالۍ پچه افغان لوبډلې وګټله او لومړۍ يې د توپوهنې پرېکړه وکړه.

افغان ملي لوبډلې په شل اورونو کې د خپلو شپږ لوبغاړو په سوځېدو زمبابوې کرکټ لوبډلې ته ۱۴۵ منډې هدف وټاکه.

د افغان لوبډلې په توپوهنه کې کريم جنت ۵۴ او محمدنبي ۴۴ منډې وکړې. زمبابوې لوبډلې په شل اورونو کې د خپلو شپږو لوبغاړو په سوځېدو دغه هدف پوره کړ.

د زمبابوې پيليز توپ وهونکي برېن بونوت په ۴۹ توپونو ۴۹ منډې جوړې کړې.

د افغان لوبډلې په توپ اچوونکو کې نوین الحق درې، راشدخان دوه او محمد نبي يو لوبغاړي وسوځول.

د همدې سياليو دويمه راتلونکې لوبه د جمعې په ورځ د زمبابوې په هراري لوبغالي کې تر سره کيږي.