په هرات کې د افغانستان د فوټبال د اتلانو لیګ څلورم پړاو سیالۍ پیل شوې

د افغانستان د فوټبال فدراسیون د یوې خبرپاڼې په خپرولو سره ویلي، چې نن د جمعي په ورځ په هرات ولایت کې د دغه هېواد د فوټبال د اتلانو لیګ څلورم پړاو سیالۍ پیل شوې.

د افغانستان د فوټبال فدراسیون وايي، د اتلانو لیګ په دغو سیالیو کې د فوټبال ۱۲ لوبډلې یو د بل په وړاندې لوبیږي.

دغه فدراسیون وايي، په دغه پړاو کې لوبډلې نه یوازې د کورنۍ اتلولۍ لپاره هڅه وکړي، بلکې د اسیا کلب سیالیو ته د رسیدو لپاره یو زرین چانس د دغه لیګ د اتلې لوبډلې په تمه دی.

د افغانستان د فوټبال فدراسیون په خبرپاڼه کې راغلي، چې د دې سیالیو اتله لوبډله که د اسیا د فوټبال کنفدراسیون د جواز لرونکي کلب میعارونه پوره کړي، نو د زړې وچې د فوټبال په لوړه کچه سیالیو کې به د ګډون چانس ترلاسه کړي.

د فوټبال فدراسیون وايي، د یاد لیګ په پرانېستنه کې د طالبانو د ورزش ادارې مسولینو هم ګډون کړی او دغه لیګ په هېواد کې دننه د فوټبال د ودې او د فوټبال د استعدادونو د پیدا کولو په موخه ترسره کیږي.

د دغه لیګ په لومړۍ ورځ سرخ پوشان خوافي هرات او موج ساحل اف سي او دوهمه لوبه د صرافان هرات او عینو مېنه کندهار لوبډلو تر منځ تر سره شوه.

په دغه لیګ کې سرخ پوشان خوافی موج ساحل اف سي ته ۱ د صفر په وړاندې او صرافان هرات بیا عینو مېنه کندهار لوبډلې ته ۱ د صفر په وړاندې ماتې ورکړه.

د یاد لیګ د لوبو په دوام سبا هم دوه لوبې کیږي چې ابو مسلم فراه د خدیم اف سي سرپل او سرسبز یاشلر فاریاب د عدالت فراه په وړاندې لوبیږي.