افغان ۱۹ کلنو له سرېلانکا ماته وخوړه
د افغانستان له نولس کلنو کم عمره کرکټ ملي لوبډلې نن یکشنبه د کرکټ اسیايي شورا اړوند اسیا جام سیالیو کې خپله دويمه لوبه کې له سريلانکا د ۱۳۱ منډو په توپير ماته وخوړه. افغان لوبډلې د سريلانکا ۲۴۴ منډې هدف پوره نه کړ او يوازې يې ۱۱۲ منډې جوړې کړې.
د ۱۹ کلنو اسیا جام سیاليو د شپږمي لوبې پچه سريلانکا لوبډلې وګټله او لومړۍ يې توپوهنه غوره کړه.
سریلانکا لوبډلې په ۵۰ اورونو کې د خپلو ۷ لوبغاړو په سوځېدو افغان لوبډلې ته ۲۴۴ منډې هدف وټاکه.
سريلانکايي توپ وهونکي شاروجان شانموګاناتن په ۱۳۲ توپونو ۱۰۲ منډې جوړې کړې.
د افغان ۱۹ کلنو کم عمره لوبډلې په توپ اچونه کې الله محمد غضنفر درې سريلانکایي لوبغاړي وسوځول.
د لوبې په دويمه پاڼۍ کې ټول افغان لوبغاړي په ۲۸.۲ اور کې وسوځېدل او يوازې يې ۱۱۲ منډې جوړي کړې.
د ۱۹ کلنو اسیا جام سیاليو کې افغانستان خپله لومړنۍ لوبه هم د ۴۵ منډو په توپیر پر بنګله دېش بايللې وه.
د دې سياليو په بي ګروپ کې افغانستان، سریلانکا، بنګله دېش او نيپال لوبډلې یو تربله لوبيږي.
افغانستان به خپله درېيمه لوبه د سې شنبې په ورځ له نيپال لوبډلې سره تر سره کړي.
