افغان لوبغاړو د بدن ښکلا په نړیوالو سیالیو کې درې نور مډالونه وګټل

د بدن د ښکلا فدراسیون وایي، چې افغان لوبغاړو نن يکشنبه په مالدیف کې د بدن د ښکلا په نړیوالو سیالیو کې درې د برنزو مډالونه ګټلي دي. علي رضا اساهي او محمد ایوب اعظمي د بدن ښکلا په سیالیو کې او عبدالحلیم احمدي د ورزش او فزیک په برخه کې دغه مډالونه ګټلي.

علي رضا اساهي، چې پخوا یې د بدن د ښکلا په برخه کې د مثبت ۸۰ کیلو ګرامو په وزن کې د سرو زرو مډال ګټلی و، دا ځل یې د مثبت ۹۰ کیلو ګرامو په وزن کې د برونزو مډال وګاټه.

همدارنګه محمد ایوب اعظمي د بدن ښکلا په سياليو کې د ۱۰۰ کیلو ګرامه وزن کې دریم مقام خپل کړ.

بل افغان لوبغاړی عبدالحلیم احمدي د ۱۸۰ سانتي متره قد کې د سپورټ فریک په برخه کې دریم ځای خپل کړ او د برونزو مډال يې وګاټه.

د افغان لوبډلې ۹ لوبغاړو په مالديف کې د بدن ښکلا، فزيک او فټنس په پنځلسم پړاو نړیوالو سياليو کې برخه اخیستې وه.

په دې سياليو کې افغان لوبغاړو یو د سرو زرو، دوه د سپينو زرو، درې د برونزو مډالونه او څلورم او پنځم مقامونه خپل کړي دي.

دغه سيالۍ د ۴۰ هېوادونو د لوبغاړو ترمنځ په بېلابېلو وزني کټګوريو کې تر سره شوې.