هسپانیا کې لسکونه زرو کسانو د سیلابونو د ضعیف مدیریت له امله لاریون وکړ
په لسگونو زرو خلکو د شنبې په ورځ د هسپانیا په ختیځ ښار والنسیا کې د سیمه ایزو چارواکو له خوا د ویجاړونکي سیلابونو د ضعیف مدیریت په غبرګون کې لاریون وکړ. په دغو سیلابونو کې ۲۲۰ کسانه مړه شوي. دا د اروپا تر ټولو بده طبیعی پېښه بلل کیږي.
دغه لاریون کوونکي چې د والینسیا په مرکز کې راټول شوي، د سیمه ییز حکومت د مشر کارلو مازون د استعفاء غوښتنه کوي او "وژونکو" شعارونه ورکوي.
د لاریون والو پر یو بینر لیکل شوي «زموږ لاسونه پر خټو رنګ دي ستا لاسونه پر وینو.» ځینو لاریونوالو په خټول لړلي بوټان د دولتي ودانې څخه بهر غورځولي.
د ځپل شویو سیمو اوسیدونکو مازون تورن کړی، چې د اکتوبر د ۲۹ مې پر ماښام په اته بجو ډېر ناوخته، کله چې ډېری ښارګوټي او کلي اوبو نیولي وو، خبرتیا خپره کړه.
مازون ویلي، چې هغه به دا خبرتیا وخته خپره کړې وای که چیرې چارواکي د اوبو د څارنې د رسمي ادارې له خوا د وضعیت د جدي کیدو په اړه خبر شوي وای. رویترز وایي، چې مازون د دوی پوښتنو ته ځواب نه دی ویلی.
له ۳۰ لویو ډلو څخه چې دغه لاریون یې تنظیم کړی، د "اکسیو کلتوري ډیل پایس والنسیانو" ډلې مشرې انا اولیور وايي: «موږ غواړو د دې ناورین د ضعیف مدیریت په اړه خپله غوسه ښکاره کړو چې ډېری خلک یې اغیزمن کړي دي.»
که څه هم لاریون تر ډیره سوله ییز و، خو پولیسو ځینې لاریونکوونکي د ډبرو ګوزارولو باندې تورن کړي.
دغه سیلابونه په وروستیو کلونو کې په اروپا کې تر ټولو لویه طبیعي پیښه بلل شوې، تر دې وړاندې په ۲۰۲۱کال کې په جرمني کې د سختو سیلابونو له امله لږ تر لږه ۱۸۵ کسان مړه شوي وو.
په همدې حال کې، په ۱۹۶۷ کال کې په پرتګال کې د سېلابونو له امله شاوخوا ۵۰۰ تنه مړه شوي وو.
