هغه سترې اسمانڅکې چې هېڅوک په کې ژوند نه کوي، ولې جوړې شوې دي؟
د نړۍ په هر ګوټ کې، داسې لوړ برجونه جوړ شوي چې د دوی د ظاهر برعکس، نه د استوګنې لپاره دي او نه هم دفترونه په کې شته. دا لویې ودانۍ چې د ډیریو استوګنځایونو او سوداګریزو ودانیو څخه لوړې دي، د نویو لفټونو د فعالیت د ازماېښت لپاره دي.
د سي ان ان د راپور له مخې، د جرمني د "تور ځنګل" په ختیځ کې او د روټوایل تاریخي ښار ته څیرمه، د "ټیسنکروپ د لیفټونو د ازماېښت برج" په نوم یو لوی جوړښت د ۲۴۶ مترو په لوړوالي سره جوړ شوی.
دا په زړه پورې جوړښت په جرمني کې یو له لوړو ودانیو څخه شمېرل کیږي.
د برج بهرنۍ برخه، چې کومه کړکۍ نه لري، ښیي چې نه د استوګنې لپاره دی او نه هم د دفتري کارونو لپاره کارول کیږي، مګر دننه ۱۲ څاګانې د نویو لفټونو د ازمایښت لپاره ځای پر ځای شوي دي.
په نړۍ کې د لفټونو د ازمایښت برجونه
تیسنکروپ جرمنی شرکت، چې په نیویارک کې د وان نړۍوال سوداګریز برج په ګډون په نړۍ کې ډېری اسمانڅکو ته یې لفټونه جوړ کړي، د نړۍ په بېلابېلو برخو کې نور د ازماېښت برجونه هم لري.
یو له دغو برجونو څخه د اتلانتا د باټري سیمه کې د ۱۲۸ متر په لوړوالي یو برج دی چې د اتلانتا بریوز بیسبال لوبغالي ته نږدې جوړ شوی دی. بل برج د چین په ژونګشان کې موقعیت لري، چې ۲۴۸ متره لوړوالی لري، چې د ازادۍ مجسمې څخه شاوخوا درې برابره لوړ دی.
د لفټونو د ازمایښت برجونه ان له دې هم لوړ کیدای شي. د بېلګې په توګه، داچ -۱ برج چې د چین په ګوانګجو کې د جاپاني شرکت هیتاچي له خوا جوړ شوی او ۲۸۹ متره لوړوالی لري.
دا برج د ګوانګجو د لویو اسمانڅکو څخه یو ترټولو لوړ دی، او که دا په نیویارک کې وای، دا به د ښار د ۲۵ لوړو ودانیو څخه وای او که په لاس انجلس ښار کې واي، نو دا به د نړۍ درېیمه لوړه ودانۍ وای.
ولې دغو برجونو ته اړتیا ده؟
د کونه شرکت په نړۍ کې اسمان څوکې ودانۍ جوړوي، د دغه شرکت مشر تومیو پیکالا په وینا، د لیفټ اصلي کاري شرایط په ځانګړو ازماېښتي برجونو کې ارزول کیږي، په دې توپیر چې عادي مساپر پکې شتون نه لري. هغه زیاته کړه، چې دا برجونه د لفټونو د کیفیت، راحتۍ او اعتبار ارزولو لپاره مناسب چاپیریال دی.
پیکالا زیاته کړه: "د ځینو ازماېښتي برجونو د لوړوالي لامل دا دی چې نوي لفټونه دومره لوړ سرعت لري چې د ازماېښت پروسه یې باید ګړندی ترسره کوي.»
هغه وویل، د لفټونو سرعت چې څومره ډېر وي، هغومره لوړې ازماېښتي ودانې ته اړتیا لري.
د لوړ برجونو جوړول یوازینی حل لار نه ده. په حقیقت کې، د نړۍ تر ټولو اوږد د لفټونو د ازماېښت مرکز د ځمکې لاندې موقعیت لري. دغه مرکز چې د فنلنډ د تایتري په ښار کې موقعیت لري، د اهک د تیږې د کان یوه برخه ده او ژوروالی یې شاوخوا ۳۵۰مترو ته رسېږي.
پیکالا د دغو تاسیساتو په اړه وویل: «دا مرکز زموږ په صنعت کې بې جوړې دی، موږ موافقه کړې چې په کان کې ځینې شته څاګانې وکاروو، کوم چې موږ ته اجازه راکوي چې تر زرو مترو لوړو ودانیو لپاره مناسب لفټونه وازمایوو.»
د ګرځندوی جاذبه
د روتوایل برج چې د جرمني تر ټولو لوړه ودانۍ ده، بهرنۍ سطحه یې د فایبر ګلاس پر مټ پوښل شوې چې روښانه او ماته ظاهري بڼه یې ورکړې. د تیسنکروپ د لفټونو شرکت په وینا، دغه کار، د لمر او باد څخه د ودانۍ د ساتنې سربیره، دا برج د محلي معمارۍ پر سمبول بدل شوی.
په ۲۰۱۷ کې د برج له پرانستلو راهیسې، دا برج د ګرځندویانو د پام وړ ځای ګرځیدلی او هر کال د زینې پورته کولو سیالۍ کوربه توب کوي چې له زرو څخه ډېر خلک پکې برخه اخلي. ډېرې خلک د دې لپاره د برج لیدو ته راځي چې د جرمني تر ټولو لوړه ودانې ده او د تور ځنګل ځانګړې منظره وړاندې کوي.
د برج رییس بیاته هونله سي ان ان ته وویل: «ګرځندویان په ۳۰ ثانیو کې د ۲۳۲ متر لوړوالي ته رسیږي.»
د دې لفټونو سرعت په یو ثانیه کې شاوخوا اته متره دی او په لمرینو ورځو کې ګرځندویان کولی شي ترې د سویس الپ غرونه هم وګوري.
هغه زیاته کړه: «د کال په هر موسم کې، برج او د هغې منظره ګرځندویانو ته ځانګړې ننداره لري.»
