د ایران د پارلمان غړی: د افغان بنديانو د لېږد لپاره افغانستان سره د يوې هوکړې په لټه کې يو

ایراني رسنۍ اېرنا د ایران د پارلمان قضايي او حقوقي کمېسیون د دویم مرستیال له قوله راپور ورکړی، چې ایران د افغانستان له واکمنې ډلې سره د هغو افغان بندیانو د لېږد د هوکړې په لټه کې دی، چې په دغه هېواد کې په جرمونو تورن دي.

د ایران د پارلمان غړي عثمان سالاري دغه څرګندوني تېره ورځ په تایباد ښار کې د یوه زندان د جوړونې پر مهال کړې دي.
نوموړي وویل:«په تایباد زندان کې د بندیانو د شمېر کمولو په موخه، د ایران حکومت او د افغانستان قضايي چارواکو ترمنځ د افغان بندیانو د لېږد په اړه د یوې هوکړې په لټه کې یو.»
په ایران کې یو شمېر افغانان د نشه‌یي توکو د قاچاقو او انسان تښتونو په تور بندیان دي.
خو په ایران کې د یادو افغان بندیانو د کره شمېر په اړه معلومات نه دي خپاره شوي.
تر دې وړاندې طالبانو هم ویلي و، چې په ګڼ شمېر کې یې د ایران له زندانونو افغان بندیان افغانستان ته لېږدولي دي.