د طالبانو د کډوالو چارو وزارت: د پاکستان له زندانونو ۳۰ تنه افغانان خوشې شول

د طالبانو د کډوالو او راستنېدونکو چارو وزارت وایي، چې د پاکستان له زندانونو ۳۰ تنه افغانان خوشې شوي او (د تلې په ۱۷مه نېټه) بېرته خپل هېواد ته ستانه شول.

دغه وزارت د یوې خبرپاڼې په خپرولو سره ویلي، چې دغه افغانان د قانوني اسنادو د نه لرلو له امله د پاکستان په زندانونو کې له ۴۰ ورځو تر ۲ میاشتو پورې بندیان وو.
خبرپاڼه زیاتوي، چې دغه افغانان د انټرپول پولیسو له لوري د تورخم دروازې له لارې هېواد ته راستانه او د مرستو تر لاسه کولو په موخه د کډوالۍ نړۍوال سازمان ته ورپېژندل شوي دي.
د خبرپاڼې له مخې، د دغو خوشې شویو افغانانو په ډله کې ۱۳ تنه یې له ۱۸ کلونو د کم عمر لرونکي کسان دي.
ورته مهال په بلخ ولایت کې د طالبانو د کډوالو او راستنېدونکو چارو رییس اسدالله وفا له ګاونډیو هېوادونو غوښتي چې، له کډوالو سره په چلند کې له زغم څخه کار واخلي او له غیر ډیپلوماټیک چلند څخه دې ډډه وکړي.
هغه زیاته کړې، چې د کډوالو ځورول، ربړول او بندیانول د نړۍوالو قوانینو خلاف چاره ده.
بل خوا پاکستانۍ رسنیو هم په خپلو وروستیو راپورونو کې ویلي، چې د سپټمبر له ۹مې نېټې څخه د اکټوبر تر ۷مې نیټې یې له دغه هېواده ۲۶۶۲۲ تنه افغان کډوال افغانستان ته استولي او دا لړۍ لا هم دوام لري.