د جمهوري غوښتونکو ښځو غورځنګ: افغانستان اوسمهال د ترهګرو لپاره په جنت بدل شوی دی
د جمهوري غوښتونکو ښځو غورځنګ وایي، چې افغانستان اوسمهال د کورنیو، بهرنیو او د سیمې ترهګرو لپاره په جنت بدل شوی دی.
دغه غورځنګ د یوې خبرپاڼې په خپرولو سره وایي، د طالبانو مشر ملاهبت الله چې خپله د خلکو په منځ کې له راڅرګندېدو وېره لري؛ خو د هرې ورځې په تېرېدو په خپلو قوانینو کې د افغانستان د خلکو او په ځانکړې توګه د افغان مېرمنو لپاره یې ژوند تریخ کړی دی.
په خبرپاڼه کې دا رنګه راغلي:« طالبانو ښځې له زدهکړو بې برخې کړې، له مېرمنو یې فکري او معنوي مالکیت اخیستی، مدني ټولنې او سیاسي حزبونه یې منحل کړي، د هېواد سرچینې یې لوټ کړې او د افغانستان په بېلابېلو برخو کې بې عدالتۍ او د پخوانیو پوځیانو وژنه ترسره کوي.»
دغه غورځنګ ادعا کوي، چې طالبانو د کوم جرم د ترسره کولو پرته نږدې زر تنه مېرمنې بندیانې کړې دي.
خبرپاڼه وړاندې کاږي، چې په ټوله کې هېواد اوسمهال د افراطیت د پراخولو، د جنسیتي توپیر او نسل وژنې پر امن ځای بدل شوی دی.
دوی له نړۍوالو غواړي، چې د ترهګرۍ پر وړاندې ودرېږي او له طالبانو سره دې تعامل نه کوي؛ له هغې پرته، لرې به نه وي چې ترهګري به د دوی هېوادونه هم وځپي.
