د افغانستان او نیوزیلنډ ترمنځ د نن ورځې لوبه د باران له کبله وځنډېده

په ګرېټر نویډا کې د افغانستان د کرېکټ ملي لوبډلې او نیوزیېلنډ ترمنځ د یواځینۍ ټېسټ لوبې په دویمه ورځ لوبه د باران له امله وځنډېده.

د افغانستان کرېکټ بورډ په اېکس پاڼه لیکلي، چې د کابل په وخت په یوولسو بجو به دغه لوبغالی د لوبڅارانو له‌خوا وارزول شي او د لوبې پرېکړه به هغه مهال کېږي.
تېره ورځ هم د دغې لوبې په لومړۍ ورځ کرېکټ بورډ په اېکس پاڼه خبر ورکړی و، چې د لوبغالي د لوندوالي له امله لوبه لغوه شوې ده.
له بل پلوه تېره ورځ کرېکټ بورډ په اېکس پاڼه لیکلي و، چې د افغانستان د ملي لوبډلې پیلیز توپ وهونکی ابراهیم ځدراڼ د تمرین پر مهال ټپي شوی او د نیوزیلنډ تر څنګ له سوېلي افریقا سره هم په لوبلړۍ کې نه شي لوبېدی.
تر ابراهیم ځدراڼ وړاندې کرېکټ بورډ خبر ورکړی و، چې د افغان ملي لوبډلې تېز توپ اچوونکی نوید ځدراڼ د ژوبلېدو له امله له دغو لوبو بهر شوی دی او روغتیاپالانو ورته د استراحت سپارښتنه کړې.
درې ورځې وړاندې کرېکټ بورډ د دغې لوبې لپاره د لوبغاړو نوملړ خپور کړ.
په دغه نوملړ کې د حشمت الله شهيدي (لوبډلمشر)، ابراهيم ځدراڼ، رياض حسن، عبدالمالک، رحمت شاه، بهيرشاه محبوب، اکرام علي خېل (وېکټ ساتونکی)، شاهدالله کمال، افسر ځاځی (وېکټ ساتونکی)، عظمت الله عمرزی، ضیاء الرحمان اکبر، شمس الرحمان، قيس احمد، ظاهرخان، نجات مسعود، خلیل احمد او یما عرب نومونه شامل دي.