اتریش وايي، له جرمني سره به په ګډه افغانستان ته د مجرمینو د اخراج په برخه کې کار وکړي
د اتریش د کډوالۍ او پناه غوښتنې فدرالي دفتر ویلي، چې په دغه هېواد کې د بدلېدونکي امنیتي وضعیت له امله افغانستان ته د کډوالو ستنول جواز لري.
دغې ادارې د جرمني له پرېکړې ملاتړ کړی او ویلي یې دي، چې اتریش هم د جرمني په شان غواړي افغانستان ته د افغان کډوالو د ستنولو لړۍ پیل کړي.
دا په داسې حال کې ده، چې جرمني د جمعې په ورځ ۲۸ 'افغانان' افغانستان ته واستول.
ویانا وايي، چې غواړي له برلین سره د کډوالو د ستنولو په برخه کې همکاري وکړي.
د اتریش د کورنیو چارو وزیر کار نهمېر وایي، چې د جرمني د کورنیو چارو له وزیر سره په دې اړه په خبرو اترو بوخت دی.
د هغه په وینا، دغه هېواد په دې لټه کې دی چې څنګه افغانان او سوریایان خپلو هېوادونو ته ستانه کړي.
هغه زیاته کړې، چې د دغه هېواد د بهرنیو چارو وزارت او د بهرنیو چارو فدرالي اداره اوسمهال افغانستان ته د اخراج د عملي کولو لپاره په جدي توګه کار کوي او له یو شمېر اروپايي هېوادونو سره خبرې اترې روانې دي.
هغه وایي، دا هغه غوښتنه ده چې اتریش یې له ډېرې مودې راهیسې لري او دا به پېښېږي.
نوموړي زیاته کړې، دا مهمه ده چې موږ بېرته افغانستان او سوریې ته خلک ستانه کړو.
د هغه په خبره، دا یې د هېواد پخوانۍ غوښتنه وه چې په افغانستان کې د طالبانو له بیا واکمنېدو وروسته ځنډېدلې وه.
