کاناډا وايي، طالبانو افغانستان د ترهګرو ډلو لپاره پر یو امن ځای بدل کړی دی

د کاناډا د بهرنیو، نړۍوالې پرمختیا او کډوالو چارو وزیرانو په یوه ګډه وینا کې ویلي، چې د طالبانو له واکمنۍ وروسته افغانې نجونې په خپلو کورونو کې بندیانې شوې دي.

هغوی دا هم ویلي، چې د طالبانو تر واک لاندې افغانستان کې د ترهګرو ډلو حضور، د سیمې او نړۍ د امنیت لپاره یو ګواښ دی.
د بهرنیو چارو د وزیرې ملني جولي د نړۍوالې پرمختیا د وزیر احمد حسین او د کډوالو د چارو وزیر مارک مېلر په ویناو کې چې په افغانستان کې د طالبانو د درې کلنې واکمنۍ پر مهال یې کړې راغلي چې «د ولسواکۍ، بشري حقونو او پوهنې په برخو کې د دوو لسیزو لاسته راوړنې له منځه تللې دي.»
دا رنګه هغوی ویلي، چې «افغانستان یو ځلې بیا د ترهګرو په پټن ځای بدل شوی او دا د افغانستان، سیمې او نړۍ لپاره ډېرې بدې پایلې لرلای شي.»
په دغې وینا کې راغلي، چې «کاناډا به د افغانستان له ګاونډیانو سره د ترهګرۍ پر وړاندې مبارزه کې د هغوی په ځواکمنولو کې مرسته وکړي.»
هغوی د طالبانو له‌خوا د بشري حقونو د پراخو سرغړونو په اړه ویلي:« ښځې او نجونې په خپلو مېنو او استوګنځایونو کې بندیانې شوې او د روښانه راتلونکې لپاره یې هیلې مړاوې شوې دي.»
د کاناډايي وزیرانو په وینا کې د ځايي او مذهبي خلکو او نورو زیانمنونکو توکمونو سره شویو تاوتریخوالو ته هم اشاره شوې ده.
هغوی ویلي، چې د طالبانو تر واک لاندې افغانستان کې، «هزاره‌ ټبري، هندوان، سېکان، مسیحیان او هم جنس خوښي ځورول شوي او له هغوی سره په دوامداره توګه زور زیاتی کېږي.»
پر افغانستان د طالبانو له واکمنېدو وروسته، کاناډا یو له هغو هېوادونو څخه و، چې له ۵۳ زرو زیات افغانان یې هغه هېواد ته ولېږدول او هغوی ته یې پناه ورکړه.