د هند د ښځو کرېکټ لوبډلې نن په سریلانکا کې د اسیا جام نیمه پایلوبه کې بنګلدېش ته په ماتې ور کولو سره په نهم ځل د دې جام اتلولیو ته ووتله.
د دې جام پایلوبې ته د وتلو لپاره نن سریلانکا له پاکستان سره لوبه لري.
د سریلانکا په دمبولا ښار کې بنګلدېش د پچې ګټلو سره توپ وهلو ته مخه کړه.
دې لوبډلې د اتو لوبغاړو سوځېدو سره په شلو اورونو کې اتیا منډې جوړې کړې.
په مقابل کې هند د لسو ویکټو په لرلو یا خپلو پرانیستونکو لوبغاړو سره دا هدف پوره او پایلوبې ته ووت.
د ښځو کرېکټ اسیا جام دې نهم پړاو کې دا نهم ځل دی چې هند پایلوبې ته وځي.
هند تر دې مخکې ۷ ځلې دا جام ګټلی او اوس یې اتم ځل ګټلو ته مبارزه کوي.
د کرېکټ نړیوالې شورا په نوښت د ښځو کرېکټ اسیا جام د سریلانکا په کوربتوب رواني جولای مياشتې پر ۱۹ پيل او د همدې مياشتې پر۲۸ یې پایلوبه کېږي.