د پښتون ژغورنې غورځنګ د جرمني څانګې مسوول میوند یوسفي افغانستان انټرنشنل ـ پښتو ته وویل، چې هڅې یې روانې کړي تر څو ګیله من وزیر د درملنې لپاره جرمني ته انتقال کړي.
له اسلام اباد څخه راپورونه وايي، چې د ګیله من وزیر صحت له پخوا څخه ښه شوی او د دې وړ دی، چې د درملنې لپاره بهرني هېواد ته انتقال شي.
ګیله من وزیر پرون ماښام د پاکستان پلازمېنه اسلام اباد په بي۱۷ سیمه کې د څو کسانو په برید کې سخت ټپي شوی و.
د پښتون ژغورنې غورځنګ سرچینې افغانستان انټرنشنل ـ پښتو ته وویل چې ګیله من وزیر د پاکستان پوځ په تور لېست کې دی او د هغه د انتقالولو د ستونزو د جوړېدو وېره شته دی.
سرچینې زیاتوي؛ ډاکترانو ورته اجازه ورکړې ده، چې د ګیله من وزیر تنفسي ستونزه له پخوا څخه ښه شوې ده او د انتقال وړ دی.
په جرمني کې د پښتون غورځنګ څانګې مسوولین وايي، چې له یوې شخصي کمپنۍ سره یې د هوايي امبولانس د چمتو کېدو په اړه خبرې کړې دي او دا هر څه د شخصي هڅو او لکښتونو پر بنسټ روان دي.
خو تر اوسه دا نه ده معلومه، چې د ګیله من وزیر د انتقال پروسه به څو ساعتونه او څو ورځې وخت ونیسي.
څو ساعته مخکې خواله رسنیو کې د ښاغلي وزیر د مړینې اوازه هم خپره شوه؛ خو منظور پښتین د دې اوازې په ردولو سره ویلي، چې د نوموړي حالت نازک دی او د پروپاګند پر ځای باید د هغه صحت ته دوعا وشي.
منظور پښتین پرون د پاکستان له حکومت وغوښتل چې پر ګیله من وزیر د برید ښکېل کسان ونیسي.
که څه هم د پاکستان حکومت د دې کسانو د نیولو یا مسوولانو په هکله څه نه وايي، خو د ګیله من وزیر ځینې ملګري د تحریک انصاف ګوند یوه غړي او د جایدادونو کاروباري ازادخان داوړ ته ګوته نیسي.
منظور پښتین که څه هم پر ښاغلي وزیر د برید ګوته چا ته ونه نیوله؛ خو زیاته یې کړه، چې په دې هر څوک پوهېږي چې د برید تر شا څوک دي: «ټیک ده مخامخ چې هر څوک هم راځي، خو موږ دومره ساده هم نه یو چې نه پوهېږو؛ ارمان، عثمان، عارف درې واړه دغه ځای ته لګېږي همغه ځای ته ګیله من هم لګېږي.»