د ازادۍ په لور د ښځو غورځنګ غړو په کابل او تهران کې په یوه غونډه کې وویل، د طالبانو له لوري نجونې او ښځې له زدهکړو په بې برخې کولو سره د کم عمره نجونو او جبري ودونو لپاره زمینه برابره کړې او کورنۍ تاوتریخوالی یې زیات کړی دی.
د ښځو دغه اعتراضي غورځنګ د شنبې په ورځ (د غبرګولي ۲۶مه) له زدهکړو د نجونو د محرومیت د ۱۰۰۰ ورځو پوره کېدو په غبرګون کې په جلا جلا خبرپاڼو کې لیکلي، چې د طالبانو د «بدبختۍ او انسانیت ضد» پرېکړې پر وړاندې لازم ګامونه نه دي پورته شوي.
د دغه خوځښت په وینا، د طالبانو د سیاستونو پر وړاندې کورنۍ او بهرنۍ چوپتیا د ښځو پر وړاندې لا زیات جبر او تاوتریخوالي ته لاره هواره کړې ده.
طالبانو د ۱۴۰۰ کال د وږي میاشتې راهیسې تر شپږم ټولګي پورې د نجونو ښوونځي تړلي او پوهنتون ته یې د نجونو پر تګ بندیز لګولی دی.
د ښځو د ازادۍ غورځنګ د غړو په وینا، طالبانو په افغانستان کې جنسیتي توپیر رامنځته کړی او نړیواله ټولنه باید دا پدیده په رسمیت وپیژني.
د دغه خوځښت غړو له نړیوالې ټولنې وغوښتل چې له هرې ممکنې لارې د افغان نجونو او ښځو لپاره د زدهکړو زمینه برابره کړي.
دوی پر کورنیو هم غږ کړی، چې د خپلو لوڼو د زدهکړو د حق لپاره سره یو شي او په یووالي سره د خپلو بچیانو د زدهکړو خوبونه ریښتیا کړي.