رینا امیري: د دوحې په درېیمه ناسته کې په افغانستان کې له ښځو او بشري حقونو ملاتړ کوو
د افغانستان د ښځو، نجونو او بشري حقونو لپاره د امریکا ځانګړې استازې په اېکس پاڼه کاږلي، چې د دوحې په درېیمه ناسته کې د ښځو او بشري حقونو څخه ملاتړ کوي.
رینا امیري په دې تړاو د سولې په برخه کې د ملګرو ملتونو له مرستیالې رزمري اېن ډیکارلو سره په لیدنه کې خبرې اترې کړې دي.
نوموړې په اېکس پاڼه د امریکا او افغانستان د اړیکو ۲۲مې کلیزې په پار په خپلې یوې بلې لیکنه کې ویلي، چې د طالبانو تر واک لاندې افغانستان کې د ښځو ملاتړ، د افغانستان د مخکښانو تر منځ د نظر یووالی ډېر اړین او حیاتي مسله ده.
نوموړې تېره ورځ هم ویلي و، د ځینو هېوادونو له استازو سره یې په لیدنو کتنو کې پر دې خبره ټینګار کړی چې د دوحې په درېیمه ناسته کې باید مېرمنې او د مدني ټولنې استازي په مانا داره توګه برخه واخلي.
په پام کې ده، چې د ملګرو ملتونو د عمومي منشي انتونیو ګوترېش په کوربهتوب د افغانستان په اړه د دوحې په درېیمه ناسته کې چې د روانې میاشتې په ۳۰مه او د جولای په لومړۍ نېټه جوړېږي، د افغانستان لپاره د نړۍ د هېوادونو ځانګړي استازي ګډون وکړي.
سره له دې چې طالبانو ته هم په دغې غونډه کې بلنه ورکړل شوې؛ خو هغوی یو لړ شرایط هم وړاندې کړي دي.
