یونسیف: له پاکستانه د اېستل شویو ماشومانو واکسین ته لاسرسی ستونزمن شوی دی
د ملګرو ملتونو د ماشومانو وجهي صندوق «یونیسف» اعلان وکړ چې د دغه سازمان د پولیو د له منځه وړلو د پروګرام مشر اسټفان لاووریر د تورخم له لارې لېدنه وکړه. د دې ادارې په وینا، له پاکستان څخه د کډوالو ډله ایز اېستل ماشومانو ته د پولیو واکسین ورکول ستونزمن کړي دي.
یونیسف په ایکس ټولنیزه شبکه کې لیکلي چې د دغه سازمان د پولیو د له منځه وړلو د پروګرام مشر د غويي په ۳۰ مه د یکشنبې په ورځ د تورخم له پولې څخه لیدنه کړې ده.
د ملګرو ملتونو د ماشومانو وجهي صندوق لیکلي، چې اسټفان لاووریر په دې غونډه کې په افغانستان کې د پولیو ویروس د له منځه وړلو لپاره پر لا زیاتو اقداماتو ټینګار وکړ.
افغانستان او پاکستان په نړۍ کې یوازیني هېوادونه دي چې پولیو پکې پاتې ده.
د شري په پېښو کې زیاتوالی
د پوليو تر څنګ د روغتيا نړيوال سازمان په دې وروستيو کې په افغانستان کې د شري د پېښو پر زياتوالي اندېښنه ښودلې او له کورنيو يې غوښتي چې خپل ماشومان واکسين کړي.
دغه سازمان دا هم ویلي، چې د ۲۰۲۴ کال په لومړیو دوو میاشتو کې په افغانستان کې د شري له اوو زرو ډېرې شکمنې پېښې ثبت شوې دي.
که څه هم په افغانستان کې د طالبانو او نورو سازمانونو له خوا وخت په وخت د واکسین کمپاینونه پیل کیږي؛ خو لا هم دغه ناروغي د افغان ماشومانو ژوند ته ګواښ بلل کیږي.
