شنبههای ارغواني غورځنګ: د طالبانو زندانونه د نارینهو او ښځو د ربړونې ځایونه دي
شنبههای ارغواني غورځنګ د طالبانو تر کنټرول لاندې افغانستان کې د بشري حقونو د وضعیت په اړه د امریکا د بهرنیو چارو وزارت له کلني راپوره هرکلی کړی. دغه غورځنګ ویلي، چې دا د طالبانو د جنایتونو یوه کوچنۍ برخه ده.
دغه غورځنګ د یوې خبرپاڼې په خپرولو سره ویلي:« هغه څه چې په دغه راپور کې د بشري وضعیت او د ښځینه بندیانو د ځورونې په تړاو راغلي دا د طالبانو د جنایتونو یوازې یوه کوچنۍ برخه ده، چې د افغانستان په تړلې او دودیزې ټولنه کې رسنیزه شوې ده.»
دغه غورځنګ د راپور په تاییدولو سره ټینګار کوي، چې د طالبانو د زندانونو او بندیانو وضعیت تر هغه څه خطرناک دی کوم چې په دغه راپور کې بیان شوی دی.
د دوی په وینا، د طالبانو په زندانونو کې ډېری داسې کسان بندبان دي چې لا یې هم نومونه نه دي رسنیز شوي.
دوی په ټینګار سره ویلي:« د طالبانو زندانونه د انسانانو او ښځو د ربړونې ځای دی؛ نو له همدې امله موږ د دوی پر زندانونو د جدي څار او پر دوی د لا زیاتو فشارونو د راوستو غوښتونکې یو.»
دوی له امریکا غوښتي، چې له طالبانو دې خپل مادي او معنوي ملاتړ ودروي او د افغانستان د خلکو د کړاوونو ختمولو لپاره دې پر دغې ډلې فشار راوړي.
دوی همدارنګه له ملګرو ملتونو او د بشري حقونو له ملاتړو سازمونو غوښتي، چې د طالبانو دغه جنایتونه بابېزه ونه ګڼي او د خلکو د ملاتړ لپاره دې د طالبانو پر زندانونو د څار زمینه برابره کړي.
