د امریکا د بهرنیو چارو وزارت په خپل کلني راپور کې د بشري حقونو د وضعیت په اړه لیکلي، چې د افغانستان په شمالي ولایتونو؛ جوزجان، فاریاب او سمنګان کې له ۹۰ تنه زنداني مېرمنو څخه ۱۶ تنه یې د طالبانو له جنسي تېري وروسته مېندواره شوې دي.
دغه وزارت زیاته کړې ده، چې طالبانو لږ تر لږه ۴ مېرمنې په سمنګان ولایت کې تر جنسي تېري وروسته اعدام کړې دي.
د امریکا د بهرنیو چارو وزارت په ۲۰۲۳ کال کې د افغانستان په ګډون په یو شمېر هېوادونو کې د بشري حقونو د وضعیت په اړه خپل کلنی راپور خپور کړی.
د امریکا د بهرنیو چارو وزارت د هشت صبح ورځپاڼې د راپور په حواله لیکلي، چې د ۲۰۲۳ کال د می میاشتې په ۱۴مه په جوزجان، فاریاب او سمنګان کې د طالبانو د بندخونو ساتونکو پر ښځینه بندیانو جنسي تېری کړی.
د دغه راپور له مخې؛ د افغانستان په شمال کې د طالبانو د ډلې د غړو له خوا د پرله پسې جنسي تېريو له امله ښځينه بنديانې سقط ته اړې شوې دي.
د امریکا د بهرنیو چارو وزارت وايي؛ طالبانو امر کړی، چې د ښځینه بندیانو مېندوارۍ دې په درېیمه او پنځمه میاشت کې پای ته ورسېږي.
د امریکا د بهرنیو چارو وزارت په راپور کې دا هم ویل شوي، چې د طالبانو ډله د جنسي تېري د قربانیانو د ملاتړ لپاره هېڅ سیستم نه لري او په ۲۰۲۳ کې یې د خوندیتوب محدود خدمتونه وړاندې کړي دي.
په دغه راپور کې ویل شوي، چې تېر کال د طالبانو ډلې ۴۸ ښځې چې د جنسي تېري او ډېرې وینې بهېدو له امله ناروغې شوې وې، د فاریاب، سمنګان او جوزجان روغتونونو ته لېږدولي دي.
د امریکا د بهرنیو چارو وزارت دغه راز په افغانستان کې په ۲۰۲۳ کال کې د ماشومانو د جبري ودونو، د ښځو پر وړاندې د تبعیض، په بدو کې د ماشومانو د ورکړې، روغتیايي خدمتونو ته د نه لاسرسي او د ناموسي وژنو په اړه هم راپور ورکړی دی.
په دغه راپور کې راغلي، چې په ښاري سیمو کې د واده شویو مېرمنو په منځ کې د امیندوارۍ د مخنیوي کچه ۳۵ سلنه وه، په داسې حال کې چې دا کچه په کلیوالو سیمو کې بیا ۱۹ سلنه وه.
د دغه راپور له مخې؛ په افغانستان کې ښځې د محرم د نه لرلو په صورت کې روغتیايي مرکزونو ته د تلو له ستونزو سره مخ دي.
د طالبانو کورنیو چارو وزارت د ځانکړو ځواکونو عمومي قومندانۍ د دې ډلې د نظامي چارو کمېسون ته په مکتوب کې لیکلي، چې د ملا هبت الله په شفاهي هدایت هغه بې سرنوشته طالبان په دغه قطعه کې وګومارل شي چې د بستونو له منځه تلو سره یې بې دندې او بې معاشه دي.
د معلوماتو له مخې دغه ځانګړي قطعه په ځواکمنو او پر مختللو وسلو سمبال شي او واک به یې له کندهار سره وي او د استخباراتي معلوماتو پر بنسټ به عملیات کوي.
سرچینې زیاتوي دغه ځواک به په افغانستان کې د داعش او نورو مخالفو ډلو پرضد په وخت او چټک عملیات کوي.
افغانستان انټرنشنل ـ پښتو د طالبانو د کورنیو چارو وزارت بل مکتوب هم ترلاسه کړی دی، چې کابل ولایت ته یې لیکلی دی.
په دغه مکتوب کې ولسوالیو د بې سرنوشته طالبانو د لېستونو د جوړولو غوښتنه شوې ده، خو دا کسان باید د اړوند ولسوالۍ، امنیه قومندانۍ او استخباراتو مدیریت لخوا تاید شي.
دا ځواک په داسې حال پلانېږي چې د طالبانو د تصفیې کمېسون له خوا د دې ډلې د سرتېرو په بې دندې کېدو سره په مختلفو ولایتونو کې شکایتونه ډېر شوي دي.
د طالبانو د استخباراتو لوی ریاست یوه مکتوب کې څه مهال دا اندېښنه هم ښودلې چې ښايي په میدان وردګ کې بې دندو شوي وسلوال یې له داعش سره یو ځای شي.
دا لومړی ځل دی، چې طالبان د داعش او د نورو مخالفو وسلوالو د ځپلو لپاره ځانګړی ځواک جوړوي، خو ترې دې وړاندې د طالبانو د مشر ملا هبت الله لپاره ځواک جوړ شو.
طالبان د ۸۸۸ ځانګړي عملیاتي قطعه او ۳۱۳ بدري قطعې په نومونو ځانګړي نظامي ځواک هم لري.
