خالد حنفي: زموږ په واکمنۍ کې د مېرمنو حقونه تامین شوي دي
د طالبانو د امر بالمعروف او نهي عن المنکر سرپرست وزیر محمد خالد حنفي ویلي:« زموږ په واکمنۍ کې د مېرمنو حقونه تامین شوي او موږ چاته اجازه نه ورکوو، چې حقونه یې تر پښو لاندې کړي.»
نوموړي دغه څرګندونې تېره ورځ له بهر مېشتو افغان سیاسي شخصیتونو او سوداګرو سره په لیدنه کې کړې دي.
ښاغلي حنفي زیاته کړې، امر بالمعروف وزارت تېرو درېیو کلونو کې د پنځه زره مېرمنو د میراث حق د اخیستلو او دوی ته د سپارلو سربېره؛ په بشپړه توګه بدو کې د مېرمنو د ورکولو مخنیوی کړی دی.
ورته مهال د طالبانو تر کنټرول لاندې ملي راډیو ټلویزیون په اېکس پاڼه د دغو سیاستوالو او سوداګرو له خولې لیکلي، چې هېواد ته په راتګ سره یې د افغان مېرمنو د حقونو په تړاو اندېښنې له منځه تللې دي.
دوی زیاته کړې ده، چې نړۍ کې د افغان مېرمنو د حقونو په تړاو خپرېدونکې ډنډورې بې بنسټه دي.
خو بهر مېشتو دغو مشرانو تر دې وړاندې د طالبانو د ریاست الوزرا سیاسي مرستیال مولوي عبدالکبیر سره په لیدنه کې د نجونو د ښوونځیو او کار په اړه خپلې اندېښنې شریکې کړې وې.
خو د طالبانو تر واک لاندې رسنیو په تېره بیا ملي ټلویزیون د دغو بهر مېشتو افغانانو د دغو اندېښنو او د طالبانو د ځواب په اړه څه نه دي ویلي او په څنګ ترېنه تېر شوي دي.
