د خوړو نړۍوال پروګرام: په افغانستان کې ۱۵.۸ مېلیونه وګړي خوراکي خوندیتوب نهلري
د خوړو نړۍوال پروګرام د یوه راپور په خپرولو سره وایي، چې په افغانستان کې د خوړو د خوندیتوب ناورین لا هم دوام لري. په راپور کې راغلي، ۱۵.۸ مېلیونه وګړي (نږدې ۴۰ سلنه نفوس) د ۲۰۲۳ کال له نوامبر څخه تر دې دمه د خوراکي توکو د خوندیتوب له جدي ګواښ سره مخ دي.
دغه پروګرام لیکلي، په ۲۰۲۳ کال کې د مرستو کمي دوی اندېښمن کړي وو او داسې تمه هم کېږي چې په ۲۰۲۴کال کې به وضعیت لا پسې کړکېچن شي.
دغه پرواګرام وایي، په ۲۰۲۳کال کې یې ۱۸.۶ مېلیونه خلکو ته رسېدنه کړه چې ۸۰ سلنه یې ښځې او ماشومان دي. دغه پروګرام د خپلو ښځینه کارکوونکو د فعالیت په برخه کې پر شته ننګونو اندېښنه ځرګنده کړې؛ خو ویلي یې دي، چې په دې برخه کې د طالب چارواکو سره د دوی خبرې اترې دوام لري.
د خوړو نړۍوال پروګرام په دغه تازه خپور شوي راپور کې راغلي، د ۲۰۲۳ کال تر پایه په افغانستان کې له ۱۵.۸ مېلیونو څخه ډېر خلک (چې ټولټال ۳۶ سلنه جوړوي) د خورا سخت خوراکي خوندیتوب سره مخ وو، چې له دې ډلې ۲.۸ مېلیونو سره د خوراکي خوندیتوب په برخه کې مرسته شوې ده.
راپور کې راغلي، له هرو لسو افغان کورنیو څخه نهه یې د کافي خوراکي توکو د ترلاسه کولو لپاره مبارزه کوي چې د نفوس دوه پر درېیمه برخه یې په ۲۰۲۳کال کې بشري مرستو ته اړتیا لرله.
د دغه راپور په یوې برخه کې راغلي، چې د ۲۰۲۲ کال د ډسمبر په ۲۴مه نېټه په نادولتي موسسو کې د افغان مېرمنو پر کار د بندیز فرمان او د ۲۰۲۳کال په اپرېل میاشت کې د ملګرو ملتونو د ښځینه کارکوونکو محدودیت په ټول هېواد کې د دوی بشري فعالیتونه اغېزمن کړل.
د خوړو نړۍوال پروګرام چې د ۱۹۶۳کال راهیسې په افغانستان کې یو مهم لوبغاړی دی، د ۹.۳ مېلیونه ښځو او نجونو په ګډون یې له نږدې ۱۹ مېلیونه خلکو سره مرسته کړې ده.
