طالبان: تر ۲۰۰ ډېر افغان کډوال له پاکستان او ایرانه په خپله خوښه او جبري توګه راستانه شول
د طالبانو د کډوالو او بېرته راستنېدونکو چارو وزارت په اېکس پاڼه خبر ورکړی، چې ۱۳۰ افغان کډوال په خپله خوښه او جبري توګه د وري په دویمه نېټه د هرات د اسلام کلا لارې له ایرانه ستانه شوي دي.
د اسلام کلا د سرحدي امریت د مالوماتو پر بنسټ، د دغو کډوالو له ډلې چې کورنۍ او مجردان هم پکې شامل دي ۹۳ تنه یې اړمن پېژندل شوي دي.
د دغه امریت په وینا، دغه کسان د مرستو ترلاسه کولو په موخه د کډوالۍ نړۍوال سازمان ته ورپېژندل شوي وو چې خوراکي او غیرخوراکي مرستې یې ترلاسه کړې دي.
دغه امریت زیاته کړې، چې په دوی کې ۲۴ تنه بې سرپرسته ماشومان «وار چایلډ» موسسې ته د هغوی د کورنۍ د پېژندلو په موخه ورمعرفي شوي دي.
د دغه وزارت په یوه بل خبر کې راغلي، چې لسګونه افغان کډوال د تورخم له لارې په جبري توګه ستانه کړای شوي دي.
دغه وزارت ویلي، چې د وري په ۲مه او ۳مه نېټه ۹۶ افغان کډوال د تورخم له لارې په جبري توګه ستانه کړای شوي دي.
د ننګرهار ولایت د تورخم سرحدي امریت د مالوماتو له مخې، دغه ۱۹ کورنۍ چې ټولټال ۹۶ کسان کېږي په جبري توګه له پاکستانه ستنې کړای شوې او د طالبانو د کډوالو ریاست سره تر ثبتېدو وروسته د مرستو ترلاسه کولو په موخه د ملګرو ملتونو عالي کمېشنرۍ او د کډوالۍ نړۍوال سازمان ته ورپېژندل شوې دي.
ورته مهال تېره ورځ د کډوالۍ نړۍوال سازمان ویلي و، د وروستیو شمېرو له مخې د ۲۰۲۴ کال د فبرورۍ تر ۲۴مې پورې نږدې ۵۲۵۰۰۰ افغانان د تورخم او سپین بولدک له لارو افغانستان ته راستانه شوي، چې ډېری یې بې اسناده وو.
دغه سازمان همدارنګه ویلي، چې د راپورونو له مخې د ۲۰۲۴کال په اپرېل کې د ستنېدونکو یوې بلې لړۍ لپاره چمتووالی نیسي.
تر دې وړاندې بیا پاکستانۍ رسنیو راپور ورکړی و، چې د ۲۰۲۴ کال د مارچ تر ۱۲مې نېټې له پاکستانه د ټولو ستنو شویو بې اسناده افغانانو شمېر تر ۵۱۳زرو او ۵۰۶ ته لوړ شو او په وینا یې د ستنېدو دغه لړۍ لاهم روانه ده.
له بل پلوه د طالبانو او پاکستان ترمنځ له وروستیو ترینګلتیاوو وروسته د پاکستان د کورنیو چارو وزارت د پنجاب حکومت ته امر کړی، چې د اپرېل له ۱۵مې نېټې څخه د هغو افغان کډوالو د اېستلو لړۍ هم پیل کړي، چې د کډوالۍ ځانګړي اسناد لري.
پاکستانۍ رسنۍ جیونیوز د یو شمېر سرچینو په حواله (د کب په ۲۸مه) راپور خپور کړی و، چې د وفاقي داخله وزارت سکرتر افتاب دراني په یوې انلاین غونډه کې د پنجاب د کورنیو چارو وزیر نورالامین او نورو چارواکو ته ویلي، چې د کډوالۍ د ځانګړو اسنادو درلودونکو افغانانو د اېستلو لړۍ باید د اپرېل میاشتې په ۱۵مه نېټه پیل شي.
تر دې وړاندې د پاکستان پخواني لنډمهاله لومړي وزیر انوارالحق کاکړ ویلي و، چې د کډوالو پر وړاندې دغه پرېکړه سمه وه او راتلونکی حکومت باید دغه لړۍ روانه وساتي چې اوس هم دغه لړۍ روانه ده.
