د پاکستان د پیپلز ګوند ویلي، چې د پاکستان د ولسمشر اصف علي زرداري کشره لور اصفه بوټو زرداري د لومړۍ مېرمنې په توګه ټاکل کېږي.
د دې ګوند او د اصف علي زرداري د مشرې لور بختاور بوټو زرداري په ایکس پاڼو کې اصفه بوټو زرداري د "لومړۍ مېرمن" په توګه یادونه شوې.
پاکستاني رسنیو دا هم ویلي، چې ښاغلي زرداري پرېکړه کړې چې اصفه بوټو زرداري د لومړۍ مېرمنې په توګه معرفي کړي.
د پاکستان د ولسمشر د دغې پرېکړې په عملي کېدو سره به اصفه بوټو زرداري د دغه هېواد لومړۍ مېرمن وي، چې د دغه هېواد د ولسمشر کشره لور ده.
د ولسمشر مېرمنې ته معمولاً "لومړۍ مېرمن" ویل کېږي؛ خو اصف علي زرداري په ۲۰۰۷ کال کې د خپلې مېرمنې بېنظیر بوټو له وژل کېدو وروسته بیا واده ونه کړ او د لومړۍ مېرمنې چوکۍ د ولسمشرۍ په لومړۍ دوره کې خالي پاتې شوه.
د ښاغلي زرداري د ولسمشرۍ د دویمې دورې له پيلېدو وروسته پاکستاني رسنيو د هغه پرېکړه "تاريخي" وبلله او ليکلي يې دي، چې ٣١ کلنه اصفه بوټو زرداري د لومړۍ مېرمنې په توګه معرفي کېږي.
مېرمن بوټو زرداري د بېنظیر بوټو او اصف علي زرداري تر ټولو ځوانه لور ده، چې پلار ته تر ټولو نږدې کس بلل کېږي.
په ۲۰۲۰ کې هغې د پاکستان د پیپلز ګوند د یوې غونډې مشري کولو سره سیاسي فعالیتونو ته داخله شوه او د اصف علي زرداري د لوړې په مراسمو کې د خپل پلار سره یوځای شو.
د پاکستان ولسمشر اصف علي زرداري تر اوسه په رسمي توګه خپله لور د لومړۍ مېرمنې په توګه نه ده اعلان کړې.