د افغانستان د تېر حکومت د ټاکنیزو شکایتونو کمېسیون ویانده زرمینه کاکړ وایي، هغه روحي او رواني صدمه چې پر افغانستان طالبانو واکمنېدو ور کړه، که سل کاله هم تېر شي خپل عادي لومړني ژوند ته نه شي ستنیدلی.
زرمینه کاکړ د طالبانو له واکمنۍ مخکې، د ټآکنیزو شکایتونو کمېسون پر ویاندۍ سربېره د یوه سیاسي ګوند مرستیاله هم وه.
زرمینې خپله هم یوه مدني ټولنه لرله او په افغانستان کې یې سیاسي او مدني فعالیتونه کول.
زرمینه وایي، د طالبانو له بیا واکمنۍ یوه اونۍ وروسته لندن ته را وستل شوه او دلته میشته شوه.
زرمینې د افغانستان انټرنشنل پښتو څانګې خبریالې مسکا نیازۍ سره په خبرو کې وویل: «کله چې له افغانستان څخه لندن ته راغلم دومره شاک شوې وم چې د دوه درې ورځو لپاره مې د سترګو نظر له لاسه ورکړې وه.»
اغلې زرمینې په ژړغونې غږ زیاته کړه،چې له هېواد، کورنۍ او ملګرو یې بیلیدل ورته ډېر ستونزمن و.
زرمینه وایي: «کله کله فکر کوم چې په یوه دروند خوب ویده یم او کله چې راویښه شم هر څه به سم وي. خو نه دا یو ستر او تریخ حقیقت دی.»
هغه وایي دا حالت یوازې پر ما نه دې په ټولو هغو ځوانانو او پیغلو دی چې مجبور شول هېواد پرېږدي او د کډوالۍ بده تجربه وزغمي.
زرمینه وایي: «ځان ته ډېر وایم چې له دې حالت څخه وتلی شم، زه یې کولی شم، ترکومه به دا حالت وي؟»
زرمینه کاکړ اوس په لندن کې ژوند کوي او هلته له حقوقي او مدنې ټولنو او رسنیو سره د افغانستان د ښځو او وضعیت په اړه فعالیت کوي.
اتم د مارچ د ښځو نړۍ واله ورځ په داسې حال کې لمانځل کیږي چې په افغانستان کې د ټولنې نیمایي برخه حذف شوې ده. ښځې د زدکړو، کار، د ټولنیزو فعالیتونو، پارکونو، سینګارتونو او ورزشي ځاینو ته له تګه منع شوي. د حجاب په نوم له ښځو سره زورزیاتی شوی.
دا دی ۹۰۲ ورځې کېږي چې نجونې له زده کړو چې دیني او اساسي حق یې دی بې برخې شوي دي.