افغان کرېکټ بورډ: په ننګرهار کې د غازي امان الله خان لېسټ اې سیالۍ پیل شوې

د افغانستان کرېکټ بورډ وايي، د دغه بورډ کورني کرېکټ څانګې اړوند د زونونو په کچه غازي امان الله خان لېسټ اې سیالۍ نن د ننګرهار ولایت په غازي امان الله خان لوبغالي کې پیل شوې.

د افغانستان کرېکټ بورډ د یوې اعلامیې په خپرولو سره ویلي، په یادو سیالیو کې به د هیواد له پنځو زونونو څخه پنځه منتخبې لوبډلې د یو بل پر وړاندې سیالۍ ترسره کړي.

د دغو سیالیو لومړۍ لوبه نن د یک شنبې په ورځ د (لړم ۸مه) د مس عینک زون او امو زون لوبډلو تر منځ تر سره کیږي.

د یادو لوبډلو څخه به هره لوبډله په لومړي پړاو کې اته لوبې ترسره کوي او دوه مخکښې لوبډلې به د یادو سیالیو پایلوبې ته وځي.

د غازي امان الله خان لېسټ اې سیالیو پایلوبه به د راتلونکي نومبر میاشتې په شلمه نېټه ترسره شي.

د کرېکټ بورډ مسولان وايي، یادې سیالۍ د کورني کرېکټ د ودې له پاره خورا ګټوري دي.