د پاکستان کرېکټ لوبډلې په نړیوال جام کې سوېلي افریقا ته ۲۷۱ منډې هدف وټاکه

د کرېکټ نړیوال جام ۲۶ سیالۍ کې نن د پاکستان ملي لوبډلې د ټولو لوبغاړو په سوځېدو سره د سوېلي افریقا لوبډلې ته ۲۷۱ منډې هدف وټاکه. پاکستان د پچې ګټلو سره توپ وهلو ته مخه کړه، خو تر ۴۶.۲ اور پورې یې ټول لوبغاړي د ۲۷۰ منډو په جوړلو سره وسوځېدل.

د پاکستان لوبډلې ته پیل هم مناسب نه و او د ۳۸ منډو جوړولو سره یې دوه لومړني لوبغاړي امام الحق او عبدالله شفیق وسوځېدل.

دا لوبه د کوربه هند د چینای ښار په چدم برم لوبغالي کې روانه ده.

سوېلي افریقا سږني جام کې پنځه لوبې کړې چې څلور یې ګتلې او یوه یې بایللې ده، خو پاکستان په پنځو لوبو کې یوازې دوه ګټلې دي.