ازادۍ جبهه: په کابل کې مو ۷ وسلوالو طالبانو ته مرګ ژوبله اړولې ده
د ازادۍ جبهه ادعا کوي، چې نن ماښام یې د کابل ښار په بادام باغ سیمه کې یې په یوه چریکي برید کې ۷ وسلوال طالبان وژلي دي.
دغې جبهې نن چهارشنبې (د وږي ۲۹مه) پر خپلې اېکس پاڼې لیکلي، چې نن ماښام اوه نیمې بجې یې د کابل په بادام باغ سیمه کې د طالبانو د امنیتي قرارګاه پر یوې پوستې برید کړی، چې په پایله کې یې څلور طالبان وژل شوي او درې نور ټپیان دي.
دغې جبهې یوه ویډیو خپره کړې، چې پکې یو چا ته د ویشتلو امر کیږي او وروسته له بریده له یوې سیمې څخه د اور لمبې پورته کیږي.
تر اوسه د دغې پېښې په اړه طالبانو څه نه دي ویلي.
افغانستان انټرنشنل نه شي کولی، چې د ازادۍ جبهې د دغې ادعا تایید وکړي، خو په وروستیو کې د طالبانو ضد یو شمېر ډلو بریدونه ښيي، چې د دوی فعالیت چټک شوی دی.
