حامد کرزي د کندز ځانمرګی بريد د انساني او اسلامي اصولو خلاف ګڼلی

د افغانستان پخواني ولسمشر حامدکرزي په کندز کې کابل بانک ته څېرمه ځانمرګی بريد غندلی او دا پېښه یې د «انساني اواسلامي موازينو خلاف» عمل ياد کړی. طالبان وايي، د کابل بانک مخې ته په ځانمرګي بريد کې ۵ نظامي او ملکي وګړي وژل شوي او ۷ نور ټپيان شوي دي.

د افغانستان پخواني ولسمشر حامدکرزي پر خپله ايکس پاڼه ددې پيښې د غندنې ترڅنګ د پيښې قربانيانو ته تسليت ويلی.

نوموړي ليکلي: « دغه پیښه د انساني او اسلامي موازینو خلاف عمل دی او د لوی خدای (ج) له درباره د دغې غمجنې پېښې قربانیانو ته د جنت، کورنیو ته یې د جمیل صبر او ټپیانو ته د سملاسي روغتیا استدعا کوم.»

تر اوسه ددغه برید مسوولیت چا په غاړه نه دی، اخستې خو له دې وړاندې په کندهار کې د ورته یوه برید مسوولیت داعش پرغاړه اخستی و.

دغه برید داسې مهال ترسره کیږي، چې پرون د ملګرو ملتونو امنیت شورا یوه ناسته کې په افغانستان کې دداعش حضور اندېښمنوونکی ګڼل شوی دی.