طالبانو په جلال اباد ښار کې ۱۲۸ سیاحتي او زیارتي شرکتونه مهرلاک کړل
د ننګرهار ولایت لپاره د طالبانو د رسنیو دفتر د یوې خبرپاڼې په خپرولو سره ویلي، چې د دغه ولایت په مرکز کې یې د قانوني جواز نه لرلو له امله په تېرو څو ورځو کې ۱۲۸ سیاحتي او زیارتي شرکتونه مهرلاک کړي دي.
په خبرپاڼه کې ویل شوي، چې یادو سیاحتي او زیارتي شرکتونو د فعالیت موده پای ته رسیدلې او د فعالیت لپاره یې قانوني جواز نه درلود.
طالب چارواکي وايي، یاده پروسه یې ټولو شرکتونو ته د قانوني جواز ورکولو او د دغې ډلې په عوایدو کې د زیاتوالي په موخه پیل کړې ده.
په ننګرهار ولایت کې د طالبانو د عامې روغتیا ریاست له لوري د سې شنې په ورځ هم په بهسودو ولسوالۍ کې له روغتیايي قوانیو د سرغړونې او قانوني اسنادو نه لرلو له امله پنځه کتنځایونه، دوه لابراتوارونه او دوه د غاښونو کلینیکونه مهرلاک کړي وو.
