رېچارډ بېنېټ: د بیګم راډيو کارکوونکي دې بې له کوم شرطه ژر خوشې شي
د ملګرو ملتونو ځانګړي راپور ورکوونکي رېچارډ بېنېټ د طالب استخباراتو له لورې د بیګم راډیو د کارکوونکو نیولو ته غبرګون ښکاره کړی او له طالبانو یې غوښتي چې د دغې راډیو دواړه نیول شوي کارکوونکي ژر تر ژره بې له کوم شرطه خوشې کړي.
د تېرې سې شنبې په ورځ په کابل کې د طالبانو له لورې د بیګم راډيو خپرونې وتړل شوې خو ددغه راډيو مسوولينو وویل، چې طالبانو د دوی یو شمېر کارکوونکي هم له ځان سره بیولي.
رېچارډ بېنېټ پر اېکس پاڼې لیکلي: «د ښځو په مشرۍ د راډیو بیګم د دوو نارینه کارمندانو د نېول کېدو په اړه ژوره اندیښنه لرم او د دوی د سمدستي او غیر مشروط خوشې کېدو او د خبریالانو او رسنیو کارمندانو د ویرولو او خپل سرو نیولو د بندولو غوښتنه کوم.»
یاده دې وي چې د بیګم راډيو په یوه اعلاميه کې چې رسنیو سره شریکه شوې لیکي د طالبانو اطلاعاتو او کولتور وزارت کارکوونکي او استخبارات یې راډيو ته ورغلي، د راډيو نشرات یې بند کړي، د راډيو کمپيوټرونه، هارډډيسکونه، اسناد او ټلیفونونه یې اخيستي او له ځان سره یې وړي دي.
د افغان خبريالانو د ملاتړ سازمان هم د طالبانو له لوري د بيګم راډيو بندول غندلي او دا يې د بیان ازادۍ د ځپلو او معلوماتو ته د لاس رسي په برخو کې ځپونکې کړنه یاده کړې.
د افغان خبريالانو مرکز له نړۍوالو بنسټونو، د رسنيو له ملاتړو سازمانونو او نړۍوالې ټولنې غوښتي، چې د طالبانو د دغه ډول کړنو پر وړاندې غلي پاتې نه شي او په افغانستان کې د بیان او خبريالانو د ازادۍ د خوندیتوب لپاره اقدامات تر سره کړي.
د افغان خبريالانو مرکز له نړۍوالو بنسټونو، د رسنيو له ملاتړو سازمانونو او نړۍوالې ټولنې غوښتي، چې د طالبانو د دغه ډول کړنو پر وړاندې غلي پاتې نه شي او په افغانستان کې د بیان او خبريالانو د ازادۍ د خوندیتوب لپاره اقدامات تر سره کړي.
همدا راز افغانستان کې د ملګرو ملتونو مرستندویه ماموریت «یوناما» په کابل کې د طالبانو استخباراتو له لورې د بیګم راډيو د کارکوونکو په نیولو خواشیني ښودلې او د طالبانو له حکومت یې وغوښتل چې دغه کارکوونکي خوشې کړي.
