نصیر احمد فایق طالبانو ته؛ په ظلم او شکنجې نه شئ کولی د افغانانو غږونه غلي کړئ
په ملګرو ملتونو کې د افغانستان دایمي استازولۍ سرپرست نصیر احمد فایق د طالبانو له لورې د محمود حسن نیولو او شکنجه کولو ته په غبرګون کې وویل، چې شکنجې د افغانانو غږونه نه شي غلي کولی. نوموړی زیاتوي چې د ظلم او استبداد بنسټ دوامداره نه وي.
د محمود حسن د کورنۍ یو غړی، چې یو دیني عالم و او په کندهار کې یې د واک پر تمرکز نیوکه کړې وه، په یوه غږیز کلیپ کې چې افغانستان انټرنشنل ته لیږل شوی وايي د هغه کورنۍ د طالبانو په زندان کې د هغه د روغتیا په اړه اندیښمنه ده.
فایق پر خپلې اېکس پاڼې کاږلي: «د ترهګرۍ، ظلم او شکنجې سره، تاسو هېڅکله نه شئ کولی د ژوند له ټولو برخو څخه د میلیونونو افغانانو غږونه غلي کړئ. مخکې له دې چې ډېر ناوخته شي، د استبدادي او غیر ملي رژیمونو له تاریخ څخه زده کړه وکړئ. د ظلم او استبداد بنسټ دوامدار نه دی.»
تېره ورځ د طالبانو استخباراتي ادارې د جهادي او اسلامي ارزښتونو د ملاتړ شورا په غونډه د طالبانو د واک د انحصار په اړه د نیوکو له امله محمود حسن او عبدالقادر قانت ونیول.
د دوی نیولو پسې، تېره ورځ سرچینو افغانستان انټرنشنل ته وویل، چې طالبانو د دې ډلې درېیم منتقد روحاني عبدالعزیز شجاع هم په کابل کې نیولی دی.
محمود حسن چې د دې شورا غړی او د پنجشير د حج او اوقافو پخوانی رییس دی، ویلي وو چې طالبانو قدرت انحصار کړی دی. هغه څرګنده کړه چې پر ملا هبتالله اخوندزاده سربېره، د طالبانو کابينه کې ۱۲ وزيران له کندهاره دي.
د محمود حسن د کورنۍ غړي په دغه غږيز کلیپ کې ويلي، چې ورور يې د افغانانو د حقونو د دفاع له امله د طالبانو له خوا بندي او شکنجه شو. هغه د افغانستان له خلکو او د بشري حقونو له نړۍوالو سازمانونو څخه غواړي چې د هغه د ورور د خوشې کېدو لپاره مبارزه وکړي.
