مکسیکو د امریکا سي ۱۷ الوتکې ته د کډوالو د انتقال اجازه ورنه کړه

د مکسیکو حکومت د امریکا د ولسمشر ډونالډ ټرمپ د ادارې دا غوښتنه رد کړه، چې د کډوالو اېستونکې سي ۱۷ پوځي الوتکه په مکسیکو کې ښکته شي.

د امریکا او مکسیکو چارواکو رویټرز خبري اژانس ته وویل چې د امریکا پوځي الوتکو دوه ورته الوتنې، چې په هره یوه کې نږدې ۸۰کډوال سپاره وو، ګواتیمالا ته وکړې.

حکومت په دې ونه توانېد چې مکسیکو ته د الوتنې لپاره د سي ۱۷ټرانسپورټي الوتکې د کښېناستو په تړاو د مکسیکويي چارواکو اجازه ترلاسه کړي.

د مکسیکو د بهرنیو چارو وزارت د جمعې په ورځ وویل، چې دوی له امریکا سره « سترې اړیکې» لري او د کډوالو په ګډون پر مختلفو مسایلو همکاري سره کوي. وزارت زیاته کړه، « کله چې د بیرته راستنېدنې خبره وي، موږ تل د مکسیکويي اتباعو پر وړاندې خپله دروازه پرانېزو».

د مکسیکو چارواکو ددې الوتنې د ردولو لامل تراوسه نه دی په ډاګه کړی.

وړاندې له دې د ټرمپ ادارې اعلان کړی و چې «په مکسیکو کې د پاتې کېدو» پروګرام بیا پیلوي. ددغه پروګرام له مخې پناه غوښتونکي اړ ایستل کیږي چې په امریکا کې د دوسیو تر حل کیدو پورې په مکسیکو کې پاتې شي.

د امریکا پوځي الوتکې د دې لپاره کارول کیږي چې د ټرمپ د ملي بیړني حالت له اعلان وروسته کډوال وباسي.

دغه پوځي الوتکې په ۲۰۲۱ کال کې د افغانستان د جمهوري نظام د سقوط او امریکايي ځواکونو د وتلو پرمهال هم کارول شوې وې.

پینټاګون وویل چې امریکا په الز پاسو (تکزاس) او سان ډیاګو (کالیفورنیا) کې د ۵۰۰۰ کډوالو د اخراج لپاره الوتکې چمتو کړې دي.