د بې پولې خبریالانو ټولنه: له پاکستانه غواړو چې د افغان خبریالانو خوندیتوب تضمین کړي

په اسلام اباد کې د بې پولې خبریالانو ټولنې په پاکستان کې د مېشتو افغان کډوالو اوسنی وضعیت د اندېښنې وړ بللی او له پاکستاني چارواکو یې غوښتي چې د هغوی خوندیتوب ته بشپړه پاملرنه وکړي.

د خبریالانو دغه بنسټ د یوې خبرپاڼې په خپرولو سره ویلي، چې په اسلام اباد، راولپنډۍ او د پاکستان په نورو ښارونو کې د پولیسو ځورونه، د ویزې بې ساري فیسونه، د جبري شړلو ګواښونه هغه څه دي چې د دوی اندېښنې یې زیاتې کړې دي.
په خبرپاڼه کې راغلي: «موږ خبر یو چې د تمدیدي ویزو موده له شپږو میاشتو څخه یوې میاشتې ته راکمه شوې او تر څنګ یې د دغو ویزو په تر لاسه کولو هم زیاتې پیسې لګیږي چې دغه کار د افغان خبریالانو اقتصادي وضعیت ته بل ګوزار ورکړی دی.»
د خبرپاڼې په بلې برخه کې له خبریالانو سره د پاکستاني پولیسو په چلند نیوکه شوې او لیکلي یې دي: «هغه افغان خبریالانو چې په پاکستان کې پناه اخیستې، د ځان او خپلې کورنۍ د ژوند ژغورلو لپاره کډوالۍ ته اړ ایستل شوي، خو په پاکستان کې د پولیسو له له ځورولو، نیولو او په جبري توګه له پاکستانه د شړلو سره مخامخ شوي دي.»
د بې پولې خبریالانو اداره له پاکستاني چارواکو غواړي چې د خبریالانو خوندیتوب ته دې پاملرنه وکړي او هغوی ته دې په دغه هېواد کې د اوسېدو اسانتیاوې برابرې کړي.
ار ایس ایف د پاکستان له حکومته غوښتي چې دغو افغان خبریالانو ته دې د ویزې موده وغځوي او د هغو بیې دې راټیټې کړي. دا رنګه دغه بنسټ په مهاجر منونکو هېوادونو هم غږ کړی چې د افغان خبریالانو د میشتیدا لپاره دې د دوی د منلو بهیر ګړندی کړي او د دوی د ژوند ژغورلو لپاره دې لاس په کار شي.
له هغه مهاله چې طالبانو پر افغانستان د دویم ځل لپاره ولکه ټینکه کړه، ګڼ خبریالان او د رسنیو کارکونکي د طالبانو له وېرې ګاونډیو هېوادونو ته کډه شول چې په دغو هېوادونو کې هم له سختو ستونزو او لالهاندیو سره لاس او ګریوان دي.
که څه هم چې په پاکستان کې د کډه شویو افغان خبریالانو کره شمېرې نه دي خپرې شوي؛ خو داسې ویل کیږي چې د ۲۰۰ په شاوخوا کې خبریالان او د رسنیو کارکونکي دمګړۍ له خپلو کورنیو سره د پاکستان په بېلابېلو ښارونو کې مېشت دي.