اتونبایوا: د افغانستان په ۵ زونونو کې دې د پانګونې کنفرانس جوړ شي
د ملګرو ملتونو د سرمنشي ځانګړې استازې او د يوناما مشرې روزا اتونبايوا له طالبانو وغوښتل، چې د افغانستان په ۵ زونونو کې کنفرانس جوړ کړي.
نوموړې د طالبانو د صنعت او سوداګرۍ له وزیر نورالدین عزیزي سره په کتنه کې له هغه وغوښتل، چې په افغانستان کې د پانګونې کوم کنفرانس چې جوړ شوی و، د هېواد په ۵ زونونو کې دې هم جوړ شي.
د طالبانو د صنعت او سوداګرۍ وزارت د سې شنبه په ورځ په یوې خبر پاڼه کې ویلي، چې نورالدین عزیزي له مېرمن روزا اوتونبایوا سره کتنه کې د افغانستان صنعتي انکشافاتو، د تشبثاتو د مرکز جوړولو، د انلاین سوداګرۍ د مرکز د پرانیستنې، له خصوصي سکتور څخه د ملاتړ، د صنعتي پارکونو د برېښنا او په افغانستان کې د خصوصي سکتور ستونزو ته د رسېدنې په اړه خبرې وکړې.
دغه وزارت زیاتوي، چې په دې ناسته کې مېرمن اوتونبایوا ته د دوحې درې خصوصي سکتور د کاري ډلې په اړه هم معلومات ورکړل شول.
دغه وازت وایي، چې مېرمن اوتونبایوا په افغانستان کې پانګونې ته د رابلنې کنفرانس ستاینه کړې او له نورالدین عزیزي څخه یې غوښتي، چې دا ډول پروګرامونه دې د افغانستان په پنځو زونونو کې هم جوړ شي.
دا په داسې حال کې ده، چې د طالبانو د ریاستالوزرا اقتصادي مرستیال ملا عبدالغني برادر څو ورځې وړاندې وویل، چې دغې ډلې د راستنېدونکو صنعتکارانو او پانګوالو ته په صنعتي ساحو کې ځمکې، امتیازونه او اسانتیاوې په پام کې نیولي دي.
نوموړي دغه څرګندونې «په افغانستان کې پانګونې ته بلنه» تر سرلیک لاندې یوې غونډې ته د وینا پرمهال کړې دي.
