د ټرمپ د لوړې تر مراسمو مخکې د هغه د ډیجیټل کرنسۍ ارزښت مخ په لوړېدو دی
د دوشنبې په ورځ د ډونالډ ټرمپ نوې ډیجیټلي کرنسۍ په مارکېټ کې تر نهو میلیاردو لوړ ارزښت ترلاسه کړ او سپینې ماڼۍ ته د هغه تر ورتګ څو ساعتونه مخکې د دغې کرنسۍ حجم میلیاردونو ډالرو ته ورسېد.
د رویټرزر اژانس د راپور له مخې دغه سیکه چې د ( $TRUMP)په سمبول پېژندل کېږي، د اسیا د سوداګرۍ په ساعتونو کې ۷۳ سلنه لوړه شوې ده او د ۴۶.۰۶ ډالرو قیمت یې خپل کړی چې د مارکیټ ارزښت یې نږدې ۹.۲ میلیارده ډالره شو. د کوین مارکېټ کپ (CoinMarketCap) وېب پاڼې د راپور پر بنسټ په تېرو څلرویشت ساعتونو کې د دغې سیکې سوداګریز حجم ټول ټال ۴۲.۲ میلیارده ډالرو ته رسېدلی دی.
ټرمپ د جمعې په ورځ دغه ډیجیټل ټوکن چې د جولای په میاشت کې د هغه د ترور د هڅې انځور پرې لګول شوی بازار ته وړاندې کړ.
د هغه دغه اقدام د برېښنایي پیسو په برخه کې د فعالیتونو د پراخولو یوه هڅه ده چې تر دې وړاندې یې د ورډ لایبرټي فاینېنشل (World Liberty Financial) شرکت هم په کې شامل کړی و.
د ډیجیټلي پیسو ځینې کاروباریان او کارپوهان د ټرمپ د دغې سیکې بې ساري پرمختګ خورا حیران کړي دي.
په هانګ کانګ کې مېشت د ډیجیټل کرنسیو خپلواک څېړونکی جاستین دانتان وویل: «که څه هم دا اقدام د ټرمپ د یو بل ډراماتیک ګام په توګه ګڼل کېږي ؛خو د دغه کرنسۍ رامنځته کول پېچلې اخلاقي او څارونکې پوښتنې راپورته کړي دي.»
د دانتان په وینا، دغه پیسې د غیرمتمرکزې مالي نړۍ (DeFi) او سیاسي ډګر ترمنځ یو ترکیب دی او په عین حال کې د حکومتدارۍ، ګټې ترلاسه کولو او نفوذ ترمنځ کرښې لمنځه وړي.
هغه زیاته کړه: « ایا عام شخصیتونه، په ځانګړي توګه هغه کسان چې د سیاسي نفوذ په دې کچه کې دي، باید په بې ثباته بازارونو کې دا ډول اغېز ولري؟ دا هغه پوښتنه ده چې احتمالاً د څارونکو ادارو پام ځان ته را اړوي».
پیټر شیف اقتصادپوه او د ایرو پیسیفیک اسیټ منیجمېنټ (Euro Pacific Asset Management) شرکت سټراټېژیک پلان جوړونکي د ( $TRUMP) کرنسۍ ارزښت «نوې ډیجیټل طلا» وبلله.
ټرمپ ژمنه کړې چې د ډیجیټل کرنسیو د «ولسمشر» په توګه به یاد شي او اټکل کېږي چې د اجراییوي فرمانونو په صادرولو سره به په دې برخه کې د څارنې محدودیتونه کم کړي او د ډیجیټل شتمنیو پراخ منل به اسانه کړي.
د هغه د لوړې مراسم د دوشنبې په ورځ د ختیځې امریکا په وخت د ماسپښین په ۱۲ بجو ترسره کېږي.
د ډیجیټل کرنسیو په سیاستونو کې د څارنې محدودیتونو د کمېدو اټکل د دغه صنعت لخوا د پراخ هرکلي سره مخ شوی او د نومبر په میاشت کې په ټاکنو کې د ټرمپ تر بریا وروسته د بېټ کوین په قیمت کې هم د پام وړ لوړوالي راغلی دی.
د نړۍ تر ټولو لوی ډیجیټل کرنسي بېټ کواین د دوشنبې په ورځ په سوداګرۍ کې ۲.۶ سلنه ټیټوالی راغلی او د ۱۰۱,۸۲۶.۵۱ ډالرو په قیمت یې پلور ترسره کړی ؛خو لا هم د میاشتې په کچه ۱۰ سلنه زیاتوالی یې ثابت پاتې دی.
