مولوي عبدالکبیر: له ملا هبتالله سره مې «بیعت» د کومې ځانګړې دندې لپاره نه دی کړی
د طالبانو د ریاست الوزرا مخکینی سیاسي مرستیال او د دغې ډلې د کډوالو اوسنی وزیر مولوي عبدالکبیر وایي، له هبتالله سره یې «بیعت» په کومه ځانګړې دنده نه دی کړی؛ بلکې په «اسلام او شریعت» یې ورسره کړی. هغه له ۹ ورځني ځنډ وروسته نوې دنده ومنله.
مولوي کبیر دغه څرګندونې د خپل کار په لومړۍ ورځ د طالبانو د کډوالو او راستنېدونکو چارو وزارت د همغږۍ ناسته کې کړې دي.
مولوي عبدالکبیر د ملاهبتالله لهخوا د طالبانو د کډوالو چارو وزیر په توګه تر ټاکل کېدو ټیک لس ورځې وروسته پرون (د مرغومي په ۲۹مه) په رسمي توګه خپله دنده پیل کړه.
د طالبانو د کډوالو او بېرته راستنېدونکو چارو وزارت د یوې خبرپاڼې په خپرولو سره د ښاغلي عبدالکبیر په حوالې لیکلي، چې د دغه وزارت ټول چارواکي او کارکوونکي دې خپلو کارونو ته د تېر په څېر دوام ورکړي او د منفکۍ یا تبدیلۍ په اړه دې اندېښنه نه کوي.
د خبرپاڼې له مخې، په ناسته کې د دغه وزارت د فعالیتونو، پلانونو او ستونزو په هکله هم خبرې وشوې.
مولوي عبدالکبیر چې تر دې وړاندې د طالبانو د ریاست الوزرا سیاسي مرستیال و؛ د دغې ډلې د کډوالو او بېرته راستنېدونکو چارو وزارت د وزیر خلیل الرحمان حقاني تر وژل کېدو وروسته د ملاهبت الله لهخوا (د مرغومي په ۲۰مه) د دغه وزارت لپاره د وزیر په توګه وټاکل شو.
تر دې وړاندې ځینو سرچینو افغلنستان انټرنشنل پښتو ته ویلي و، چې کډوالو وزارت ته د مولوي کبیر نه تګ دا ګومانونه رامنځته کړي، چې هغه د طالبانو حکومت کې د خپل موقف د ټیټېدو له کبله ناراضه دی؛ خو د طالبانو د حکومت دوو سرچینو بیا افغانستان انټرنشنل ته ویلي و، چې مولوي کبیر د ملا هبتالله نوې پرېکړه منلې او راتلونکې اوونۍ به خپل کار د کډوالو وزیر په توګه پیل کړي.
خو د نوموړي مخکینۍ څوکۍ لاهم تشه پاتې ده.
