د اوربند لومړۍ ورځ؛ د غزې په مختلفو سیمو کې فلسطیني پولیس ځای پر ځای شوي
په غزه کې د حکومت د رسنیو دفتر وايي، چې په زرګونو فلسطیني پولیس افسران د حکومت د پلان د یوې برخې په توګه په مختلفو سیمو کې د امنیت او نظم ساتلو په موخه ځای پر ځای شوي دي. د غزې ښاروالۍ «د سړکونو بیا پرانېسته او بیارغونه» پیل کړې ده.
د الجزېرې د خبر له مخې، د فلسطیني حکومت وزارتونه او ادارې په بشپړ ډول چمتو دي چې د حکومت له پلان سره سم کار پیل کړي څو د عادي ژوند چټک او تدریجي راستنیدل ډاډمن شي.
د فلسطیني چاراوکو په وینا، د بې ځایه شویو خلکو راستنېدل به د اوربند له پلي کیدو څخه اووه ورځې وروسته پیل شي.
دوه مصري سرچینو رویټرز ته وویل، چې د مرستې رسولو شاوخوا ۲۰۰ لارۍ، چې ۲۰ یې د تیلو بار وړونکې دي، د یکشنبې په ورځ د اسراییل تر کنټرول لاندې کریم شالوم له لارې غزې تړانګې ته تګ پیل کړ.
د رویټرز د خبر له مخې، د یکشنبې په ورځ د غزې په سړکونو کې د وسله والو او حماس چارواکو د صحنو په اړه د اسراییل د بهرنیو چارو وزیر ګیدیون سار وویل: « له بده مرغه، موږ د حماس د پوځي او حکومتي وړتیاوو د له منځه وړو هدف ته ونه رسیدو. موږ دا حقیقت منو چې موږ لا تر اوسه خپل اهداف نه دي ترلاسه کړي، خو موږ ژمن یو چې دا کار وکړو.»
پر غزې د اسراییل برید د ۲۰۲۳ کال د اکتوبر په ۷مه د حماس ډلې لهخوا د اسراییل پر سویلي سیمو له بریدونو وروسته پیل شو.
په دغو بریدونو کې له ۱۱۰۰ څخه زیات کسان ووژل شول او شاوخوا ۲۴۰ کسان یرغمل شوي دي.
له هغه وروسته اسراییل هم پر غزې بریدونه پیل کړل. په تېرو ۱۵ میاشتو کې په غزه کې لږ تر لږه ۴۶،۷۰۷ کسان وژل شوي دي، چې شاوخوا ۱۸،۰۰۰ ماشومان هم پکې شامل دي.
په غزه کې د جګړې له امله لږ تر لږه ۱۱۰،۲۶۵ کسان ټپیان شوي دي.
