ملګرو ملتونو پر درې زره بې ځایه شویو کورنیو ژمنۍ مرستې وېشلي دي
د کډوالو لپاره د ملګرو ملتونو عالي کمېشنرۍ د (مرغومې په ۲۷مه) په یوې خبرپانه کې ویلي چې په خوست، پکتیا او غزني ولایتونو کې یې له درې زره کورنیو سره ژمنۍ مرستې کړي دي.
د یو این ایچ سي ار په خبرپاڼه کې راغلي چې دغه مرستې یې له بې ځایه شویو کورنیو سره کړي، چې د ژمي په سړې هوا کې پرې خپلې اړتیاوې پوره کړي.
د یاد سازمان د معلوماتو له مخې دغه مرستې د چاینا ایډ China Aid مرستندویه ادارې په مالي مرسته ترسره شوي، خو په خبرپاڼه کې یې د مرستو بڼه نه ده څرګنده کړې.
د کډوالو لپاره د ملګرو ملتونو عالي کمېشنرۍ تر دې مخکې هم د دا ډول مرستو خبر ورکړی و، خو ملګرو ملتونو سازمان تر دې دمخه اندېښنه ښوولې چې په روان ژمي کې به د هېواد دننه د لوږې کچه خورا لوړه شي.
همدا راز د ملګرو ملتونو د سیاسي استازولۍ مرستیال تازه په کابل کې خبرداری ورکړی چې په افغانستان کې نږدې ۲۲میلونه افغانان بشري مرستو ته اړتیا لري او باید لاسنېوی یې وشي.
پر افغانستان د طالبانو په واکمنیدو سره ګڼو نړیوالو مرستندویه ادارو خپل دفترونه تړلي او له همدې امله په هېواد کې تر پخوا د بشري مرستو کچه هم راکمه شوې ده. باورونه دا دي چې طالبانو پر نجونو د زده کړو او پر ښځو د کار د بندیزو له امله په لوی لاس پر افغانستان بشري مرستې راکمې کړي دي.
یو شمېر نړۍ والو بشري مرستندویه ادارو وار د مخه خبرداری ورکړی، تر هغې چې طالبان خپل افراطي بندیزونه ختم نه کړي او له نړیوالو سره ښه تعامل پیل نه کړي؛ نو په کابل کې به خپل دفترونه تړلي وساتي.
