محمد اشرف غني: په خپل حکومت کې مې زر نوي جوماتونه جوړ کړي وو
پخواني ولسمشر اشرف غني په یوه تازه پوډکاسټ کې ویلي چې د خپل حکومت پر مهال یې د افغانستان په بېلابېلو سیمو کې د جوماتونو جوړولو او ساتنې ته ځانګړې پاملرنه کړې وه.
نوموړي زیاته کړه چې د جوماتونو جوړول د خلکو له بنسټیزو غوښتنو څخه وه او حکومت یې هڅه وکړه چې دې اړتیا ته ځواب ووايي.
د اشرف غني په وینا، په بېلابېلو ولایتونو او ولسوالیو کې د ده د واکمنۍ پر مهال شاوخوا زر نوي جوماتونه جوړل شول او د تاریخي جوماتونو د بیا رغونې او ساتنې ځانګړي پروګرامونه یې هم پیل کړي وو. هغه وویل چې د شاه دوشمشېره، پل خشتي او عیدګاه په څېر تاریخي جوماتونه یې له نړیدو وژغورل.
د غني په خبره، د هرات جامع جومات چې د تیموریانو د دورې د معمارۍ شاهکار بلل کېږي د بیا رغونې لپاره یې ځانګړی پنځه کلن پرګرام هم پیل کړی و.
د افغاستان پخواني ولسمشر د دغو جوماتونو د مالي ملاتړ په اړه وویل: « د ملا امامانو ورځني لګښتونه او معاشونه، د دولت د مرستو سربېره، باید د خلکو له اعانې او د اوقافو د سیسټم له بیا احیا څخه تمویل شي». هغه اوقاف د مذهبي مرکزونو لپاره د مالي تمویل د سنتي سرچینو په توګه یادکړل.
پخواني ولسمشر د بالاحصار تاریخي جومات د بیا رغولو غوښتنې په اړه هم یادونه وکړه، چې د دویم افغان-انګلیس جګړې په ترڅ کې د بریټانیا له خوا ویجاړ شوی و. هغه څرګنده کړه چې د ترسره شویو هڅوسربېره د دغه جومات دقیق ځای نه و معلوم شوی؛ خو اوس تازه د بریټانیا په یوه کتابتون کې د ۱۸۳۰مو کلونو د انځورونو په خپرېدو سره د دې جومات اصلي ځای موندل شوی دی.
غني هیله وښوده چې دغه تاریخي جومات، چې د تیمورشاه دراني د دورې د کابل یو سمبول و، د معاصر افغانستان د درې سوه کلنۍ د تاسیس په مناسبت په خپل اصلي ځای کې بیا ورغول شي.
د طالبانو له لوري د جمهوري نظام تر نسکوریدو وروسته جلا وطنه پخوانی افغان ولسمشر محمد اشرف غني په متحده عربي اماراتو کې مېشت دی او له هغه ځایه وخت ناوخت له رسنیو سره د مرکو تر څنګ په بېلابېلو موضوعاتو خپل شخصي پوډکاسټونه هم خپروي.
