ملا برادر له افغان او بهرنیو پانګوالو غوښتي، چې په افغانستان کې پانګونه وکړي
د طالبانو د ریاستالوزرا اقتصادي مرستیال ملا عبدالغني برادر وایي، دغې ډلې د راستنېدونکو صنعتکارانو او پانګوالو ته په صنعتي ساحو کې ځمکې، امتیازونه او اسانتیاوې په پام کې نیولي دي.
نوموړي دغه څرګندونې نن (د مرغومي په ۲۷مه نېټه) «په افغانستان کې پانګونې ته بلنه» تر سرلیک لاندې یوې غونډې ته د وینا پرمهال کړې دي.
طالبانو ویلي، چې په دغې غونډه کې د دوی د ډلې د کابینې یو شمېر وزیرانو، د بهرنیو هېوادونو سفیرانو، د نړۍوالو بنسټونو استازو، ملي سوداګرو، پانګوالو او د خصوصي سکټور استازو هم برخه اخیستې وه.
ملابرادر ویلي، چې دغې ډلې د اقتصادي ودې، د کاري فرصتونو په برابرولو، له خصوصي سکټور څخه د ملاتړ او د سوداګرۍ او ترانزیټ په برخه کې د لازمو اسانتیاوو د رامنځته کولو په موخه بنسټیز ګامونه اخیستي دي.
هغه زیاته کړې، چې د راستنېدونکو صنعتکارانو او سوداګرو لپاره د جوړ شوي طرزالعمل له مخې ټول صنعتکاران او سوداګر تر پنځو کلونو پورې د کارکوونکو له مالیې پرته له نورو مالیاتو معاف دي.
هغه وړاندې ویلي، چې بهرنیو کارکوونکو او انجنیرانو ته دوه کلنې ویزې هم ورکول کېږي.
هغه دا رنګه د طالبانو تر واک لاندې ټولو ادارو ته سپارښتنه کړې، چې د پېرلو پرمهال دې د کورنیو تولیداتو او محصولاتو ته لومړیتوب ورکړي.
هغه له ټولو افغان صنعتکارانو او پانګوالو غوښتي، چې خپل صنعت او پانګه افغانستان ته انتقال کړي او د هېواد په پرمختګ کې خپل مسوولیت ادا کړي.
د طالبانو د صنعت او سوداګرۍ وزیر نورالدین عزیزي بیا وایي: «د دغې ډلې ټول فعالیتونه اقتصاد محوره دي او موږ دغه چاره په خپلو فعالیتونو کې ثابته کړې ده.»
هغه وایي، نن د خصوصي سکټور په هڅه او نوښت په افغانستان کې د اقتصادي يرمختګونو شاهدان یو.
خو لا هم د سوداګرو تر څنګ ګڼ افغانان اړ اېستل کېږي، چې له هېواده پښې سپکې کړي.
د طالبانو لهخوا د مېرمنو تر څنګ د خلکو پر ازادیو لګېدلو بندیزونو خلک اړ اېستي، چې له خپل هېواده کډه وکړي.
د دې تر څنګ ګڼ افغان پانګوال د طالبانو د واکمنۍ په څپ څپانده حالت ډاډمن نه دي او نه هم نړۍوال پانګوال په افغانستان کۍ پانګونې ته زړه ښه کوي.
