ننګرهار کې د امنیه قومندانۍ مخ ته تر غلا وروسته طالبانو «یو وسلوال غل وواژه»
د ننګرهار لپاره ځايي طالب چارواکي وايي، د دغه ولایت په مرکز جلال اباد کې د امنیه قومندانۍ مخ ته څو وسلوالو غلو یو کس لوټلی او د تېښتې هڅه یې کوله. طالبان وايي، د دوی ځواکونو یې د مخنیوي هڅه وکړه، چې له امله یې غلو پر دوی ډزې وکړې او په ځوابي ډزو کې یو وسلوال غل ووژل شو.
باختر اژانس د طالب چارواکو په حواله وايي، «د امنیه قومندانۍ مخ ته څو وسلوالو غلو د یو کس له جیبونو موبایلونه، پیسې او نور قیمتي توکي په زور اخیستي وو او غوښتل یې د پېښې له ځایه د ریکشا په وسیله وتښتي.»
په خبر کې زیاته شوې چې طالبانو یې د نیولو هڅه وکړه، خو غلو پر دوی ډزې وکړې او په مقابل کې دوی یو غل وواژه.
طالبان وايي، نور غله له سیمې تښتېدلي، خو دوی یې د نیولو هڅه کوي.
د طالبانو واکمنېدو او په افغانستان کې د بې کارۍ زیاتېدو سره پر کلیو سربېره ښارونو کې هم د ګاډو، موبایلونو او نورو توکو د لوټ وسلوال غله پیدا شوي دي.
ځینې وخت دا غله د طالبانو په جامه کې د خلکو کورونو ته هم اوړي، همدا وجه ده چې څو میاشتې مخکې په ننګرهار کې ځايي طالب چارواکو ته امر وکړ چې که څوک د دوی په جامه کې کورونو ته ورځي، نو له امنیه قومنداني سره تماس ونیسي.
د طالبانو سرتېري تر ډېره د نظامي یونیفارم پر ځای کالیو کې ګرځي، چې له امله یې د دوی په جامه کې د غلا غدیو پېښې هم ډېرې کړې دي.
نږدې دوه اونۍ وړاندې ننګرهار کې طالب چارواکو له خپلو سرتېرو وغوښتل چې نظامي یونیفارم واغونځي.
په ننګرهار کې د طالبانو د امنیه قوماندانۍ د اميتي چارو مرستيال مولوي محمد طاهر مبارز هغه مهال وویل، چې دا اقدام يې د نظم د ټينګښت او له خلکو سره د اړیکو نږدېوالي په موخه کړی.
