د منځني ختیځ کړکېچ؛ په غزه کې د اسراییل په بریدونو کې ۲۲ فلسطینیان وژل شوي
الجزیرې د روغتیایي چارواکو له قوله راپور ورکړی، چې د پنجشنبې له سهار راهیسې د غزې په تړانګه کې د اسراییل په بریدونو کې ۲۲ فلسطینیان وژل شوي دي.
ویل کیږي، چې په وژل شویو کې ښځې او ماشومان هم شامل دي.
بل پلو د اسراییلي سرتېرو او محافظینو له ۸۰۰ څخه زیاتو والدینو د لومړي وزیر بنیامین نتنیاهو څخه د جګړې د پای ته رسولو غوښتنه کړې او ویلي یې دي، چې «موږ نه غواړو چې غزه زموږ د ماشومانو هدیره شي.»
په غزه کې د اسراییل په برېدونو کې د ۲۰۲۳ کال د اکټوبر له ۷ راهیسې لږ تر لږه ۴۶ زره فلسطینیان وژل شوي او ۱۰۹ زره او ۳۷۸ نور ټپیان شوي دي.
په همدې موده کې د حماس په مشرۍ د بریدونو په ترڅ کې لږ تر لږه ۱۱۳۹ تنه په اسراییل کې وژل شوي او تر ۲۰۰ زیات یرغمل شوي دي.
